Roja verêne ya rayraşîyayîşê 3 rojan merkezanê cîyayan ê eyaletê NRWyî yê Almanya Dortmund de dîya destpêkerdene. Hemserekîya KON-MEDî hukmatê Almanya hişyar kerd ke welatê xo de pê qedexeyê reng û dezgehanê kurdan tecrîd ano ca.
Rayberîya FED-MED û YJK-E NRW yê eyaletê North Rhein-Westfalenî (NRW) yê Almanya de vizêr rayraşîyayîşê 3 rojan bi şîarê 'Rayber Apoyî rê azadîye, azadîye do ser bikewa' Dortmund de dest pêkerd. Rayraşîyayîş de pankarta 'Rayber Apoyî rê azadîye' ameye akerdene.
Pêro roje temsîlkaranê dezgehan çalakîye de qisey kerd û eşkerayîyî ameyî wendene. Vervatoxa YJK-E Aytene Kaplan û Hemserekê KON-MEDî Engîn Severî zî qisey kerd. Aytene Kaplan ard ziwan ke dewletê Ewropa bi bêvengîya xo tecrîdî tesdîq kenê. Severî zî îfade kerd ke ê tecrîdê vera Rayberê Şarê Kurdî qetî qebul nêkenê û venga pêro dewletan da ke vera tecrîdî tewirêkê zelalî bimojnê dewleta tirke.
Roja yewîne pê sloganê 'biciwîyo xoverdayîşê gerîlayan' û 'biciwîyo Serek Apo' qedîyaye. Çalakîye ewro saete 11.00-17.00 de Heumark de şaristanê Kolnî de do dewam bikera.
