Rayraşîyayîşo Dergo ke her serre sey tradîsyonkî hetê têgêrayîşê ciwananê kurdan ra semedê azadîya Rayberê Şarê Kurdî Abdullah Ocalanî yeno kerdene emser do çarçewaya hemleya "Werin Cenga Azadiyê" de serkêşîya ciwanan de mabênê 06-11ê sibate Fransa de bêro kerdene.

Rayraşîyayîş do  bi şîarê bajarê "Bi îradeya ciwanên Apoyî emê Rêber Apo azad bikin" Sierentzî ra ver bi Strasbourgî bêro kerdene.  Yeno pawitene ke Fransa, Almanya, Swîsre, Awusturya, Îngîlîstan û heme Ewropa ra bi seyan ciwanî tewrê çalakîye bibî.

Komîteya organîzekerdişî derheqê rayraşîyayîşî de eşkerayîye daye û nê vatî: ''Dîktatorîya Erdoganî bi heme hêzê xo hêrişê kurdan kena. Tewr zaf zî afernayoxê têkoşînê azadîye yê Kurdîstanî Rayberê Şarê Kurdî Abdullah Ocalan yeno hedef girewtene. Kurdî rixmê heme hêriş û qirkerdişan têkoşînê biheytî rayra benê. Heme dinya, dost û dişmen zanê ke Rayberê Şarê Kurdî Abdullah Ocalan semedê şar û ciwananê kurdan yeno çi mana. No dewro ke tecrîd ameyo xorîkerdene û Kurdîstan de xeta xîyanetî esta ma veng danê ke wa her kes tewrê çalakîya ma bibo. Wext wextê têkoşînî yo. Wext wextê Kurdîstanî îşxalkeran ra pakkerdişî yo. Ciwanê Kurdîstanî do vera îşxalkeran û faşîzmî têkoşînî pîlêr bikerê û ser bikewê.  Çalakîya ke me bi ruhê hemleyanê şorişgêran Cengê Xebûrî û Bazanê Zagrosî organîze kenê  de ma wazenê veng bidê welatanê Ewropa ke wa paştî medê qirkerdişê dewleta tirke yê vera kurdan.''