Xeylêk welatanê Ewropa ra bi hezaran kesê ke ewro bajarê Strasbourgî yê Fransa de ameyî têhet bêvengîya dezgehanê mîyanneteweyî yê vera tecrîdê serê Rayberê Şarê Kurdî Abdullah Ocalanî şermezar kerde.

Mîtîngo ke Place de la République de ame kerdene de badê rêzgirewtişî Berpirsîyara Tekîlîyanê Teberî ya KCDK-E Bêrîvane Firat qisey kerd. Firate vat: Pê talîmatanê dîktator Erdoganî Kurdîstan sûcê şerî yeno kerdene, çekê kîmyewîyî yenê şuxulnayene. Tecrîdê serê Abdullah Ocalanî yeno xorîkerdene  ke meseleyê nêrê çarekerdene. Ma ewro tîya bêvengîya dezgehanê Ewropa şermezar kenê.

Dima ra Hemserekê Kongra-Gelî Remzî Kartalî qisey kerd. Kartalî vat: ''Ganî çar leteyê Kurdîstanî û dostê kurdan semedê azadîya Rayber Apoyî bibê seferber. Ma heme waranê sîyasî, dîplomasî, resnayîş û komelkî de têkoşînî pîlêr bikerê. Çunke ma ewro nêzanê ke rewşa Rayber Apoyî senîn a. Ma tîya çalakîya pîle kenê. Rixmo ke CPTyî badê cigêrayîşê Îmraliyî  vat Îmrali de îşkence esto, dezgehê Ewropa çîyêk nêkenê. Me mecburê ke semedê wayîrvejîyayîşê Rayber Apoyî û azadîye ey çalakîyan zafêr bikerê û têkoşînî pîlêr bikerê. Ganî semedê azadîya Rayber Apoyî û çareserkerdişê meselaya kurdî bêrê Îmraliyî bêrê akerdene.''

Bi nameyê Têgêrayîşê Cinîyan ê Kurdan ê Ewropa Zozane Serhat zî bale ante xeta xayînîye ya PDKyî ya ser û derheqê tecrîdê giranî de qisey kerd. Serhate vat: ''Rayîrê çareserkerdişê demokratîkî yê meseleya kurdî Îmraliyî ra ravêreno. Ma heme welatanê Ewropa yê ke hemkarê nê sûcî yê hîşyar kenê û wazenê ke wa berpirsîyarîya xo bîyarê ca.''

Çalakîye verê Parlamentoyê Ewropa de pê deyîranê Hozan Şemdînî qedîyaye.