Renée Le Mignot ard ziwan de ameyoxê Sûrîye ganî teslîmê dîktatorîyêka Îslamî ya radîkale nêra kerdene û vat: ‘’Modelê Rojawanî seba ameyoxê Sûrîye û Rojhelatê Mîyanênî mîsalêko bêhempa yo.’’
Hemsereka Têgêrayîşê Dostanîya Mabênê Şaran û Têkoşînê Vera Nîjadperestîye (MRAP) Renée Le Mignot derheqê hêrişanê vera Rojawanî û girîngîya modelê Rojawanî de ANFyî rê tayê ercnayîşî kerdî.
Renée Le Mignot îfade kerd ke rijîyayîşê rejîmê Esadî ra dima Sûrîye de vurîyayîşêko pîl nêqewimîyayo û vat: ‘’Dewleta tirke destpêkê şerê zereyî yê Sûrîye ra nata vera Rojawanî dişmenîye kena. Hêrişê dewleta tirke hem sûcê şerî yê hem zî sûcê vera merdimatîye yê. Seke bi belgeyan ameyo îsbatkerdene dewleta tirke Rojawan de raşta raşte sivîlan hedef kena û xîret kena ke sîstemê Rojawanî bi temamî birijna.’’
Renée Le Mignot tewirê Ewropa yê vera dewleta tirke rexne kerd û vat: ‘’Îdarekarê Ewropa binê şantajanê Erdoganî de yê. Verê cû tay mehkemeyan de ke ez zî beşdara nînan bîya sûcê dewleta tirke yê vera kurdan ameyêne muhakemekerdene. Nînan de netîceyê serê PKKyî seba ma girîng bîyê. Mehkemeyan bire dabî ke şerê mabênê Tirkîya û PKKyî sey şerêkê çekdarî vînenê û pare kerdêne ke PKK goreyê Peymana Cenevre têgêreno la dewleta tirke ney. Coka sey têgêrayîşî ma Fransa ra wazenê ke PKK lîsteya terorî ra veja.
Şarê kurdî hertim beno qurbanê menfaetanê ekonomîk û polîtîkan. Ewropa koçberan ra semed verê şantajanê Tirkîya de sereyê xo ana war.’’
Renée Le Mignot pare kerd ke sîstemê Rojawanî seba demokrasîyê Rojhelatê Mîyanênî modelêko bêhempa yo û vat: ‘’Modelê Rojawanî seba demokrasîyî cayê hûrmetî yo. Rojawan de têdûştîya cinî û camêrdan yena caardene. Rojawan de şerwanê cinîyî nîşaneya hêzê cinîyan a. Rojawan heman wextî de tecrubeyê ekoloj û komelî yo. No model ganî hetê sîyasî ra bêro pawitene.’’
Renée Le Mignot diyar kerd ke rêxistina cîhadîste HTŞyo ke bîyo îqtîdarê Sûrîye seba ameyoxî tehlukeyêko pîl o û vat: ‘’Modelê Rojawanî seba pêro meseleyanê Sûrîye eşkeno bibo çareserîye. Bi rijîyayîşê rejîmê Esadî kêfê merdiman ame la herinda ci de dîktatorîyêka Îslamî ronîyaye. Ma dî ke dîktatorîyêka winayêne Îran de se kena. Coka ma nêeşkenê bi sîstemê Sûrîye bawer bikerê. La eke modelê Rojawanî bêro esaskerdene Sûrîyeyêka demokratîke do awan biba.’’
