Bajarê Reutlîngen ê Almanya de adirê Newroze ame wekerdene. Bajarê Lîege yê Belçîka de zî şewêk amî organîzekerdene.

Reutlîngen

Bajarê Reutlîngen o ke pabesteyê eyaletê Baden-Württemberg ê Almanya yo de aktîvîteya Newroze ya ke hetê Merkezê Cimatê Kurdan ê Demokratîkî ra amî organîzekerdene rê sere de Afrîkayij, Rûs, Alman û Yunanî xeylî neteweyanê bînan ra şar tewrê ci bi. Hemserekê MCKD ê Reutlîngenî Mahmût Unverî qiseykerişê xo de ard ziwan ke Newroze bi hezaran serran o ke yena pîrozkerdene û şaro Kurd her Newroze hîna zaf ver bi serkewtişî şino. Unverî vat, “Sayeyê ê kesanê ke koyan de xover danê, ê kesanê ke zîndanan de û her cayê dinya de bedenê xo dayê verê vêşanîye, nizd ra do faşîzm birijîyo, no tecrîdo ke şexsê Rayberîya ma de hemverê şarê ma de yeno bicaardene wedarîyo û axir Kurdistan do azad bibo.”

Pîrozkerdişê Reutlîngenî bi şahidê dîmenanê rengênan. Rîtimê tradîsyonkîyî yê Afrîkaya Rojawane hetê grûba Safnama ra ameyî cinitene. Dima ra grûba folklorî ya domanan a bi nameyê Zarokên Mezrabotanî, ekîba dansî ya Komela Dîyalogî ya Rûsan û grûba folklorî ya komela Yunanan wareyê akerdeyî de hunerê xo pêşkêş kerdî. Bi tewrbîyayîşê hunermendanê cayîyan ê sey Dîyar, Zenar Rojava û Hozan Sîmarî govendî ameyî kerdene.

LÎEGE

Şaristanê Lîege yê Belçîka de roşanê Newroze bi aktîvîteyêk ame pîrozkerdene. Pîrozkerdiş hetê NAV-BEL û YJK-B ra ame organîzekerdene. Pîrozkerdişî de govendî û qiseykerdişê sîyasîyî ameyî kerdene. Dimayo ke hemserekê NAV-BEL’î Fehmî Çetînkayayî qisey kerd, qiseykerdişêkê endamê Konseya Rayberdişî ya KCK'yî Cemîl Bayikî yê derheqê Newroze û averşîyayîşanê sîyasîyan de dîya goşdaritene.  Bayikî bale ante serê muhîmîya Newroze û êyê ke qirkerdişê Helebçe de cuya xo vîndî kerdîbî bi vîr ardî. Bayikî tecrîdê serê Rayberê Şarê Kurdî Abdullah Ocalanî û grevê vêşanîye ardî vîrî û vat ke ganî xoverdayîş bêro xurtkerdene.

Dima ra sîyasetkaro Kurd Kemal Aktaşî qisey kerd û vat ke ganî tecrîdê serê Ocalanî tavilî bêro wedaritene. Aktîvîte de Dîlo Doxan, Nûarîn û Farqîn Azadî sehne de ca girewt, hunermendo cayî Bîşo Bacînîyî zî bi kemençeyê xo sehne de ca girewt. Pîrozkerdiş bi govend û sloganan qedîya.