Riza Baranî rê hetê Eyaletê Berlînî ra nîşan ame dayene

Emser Riza Baran zî yewê kesanê ke nîşanê Eyaletê Berlînî înan rê yenê dayene ra bîyo. Baran sîyasetmedar û perwerdekaro Kurd o. Baranî nîşanê xo destê Şaredarê Berlînî Mullerî ra girewt.

Eyaletê Berlînî yê Almanya nîşan dano kesanê beşanê cîyayan ê ke komel û şaristan rê xizmet kenê. Îdareyê Eyaletî emser zî 12 kesî erjê nîşanî dîyî. Seba nîşanî zî bînaya tarîxî ya şaredarîya Berlînî de merasîmêk ame viraştene.

Kesanê  ke merasîm de destê Şaredarê Berlînî Mîchael Mullerî ra nîşan girewt, înan ra yewê zî sîyasetmedaro Kurd Riza Baran bi. Barano ke heman wextî de pê perwerdekarîya xo zî yeno şinasnayene, Îdareyê Eyaletî semedê xîretanê ci yê babeta 'perwerde de firsendê seypêyîye' erjê nîşanî dî.

Riza Barano ke serra 1963 ra nata Almanya de ciwîyeno, sazkerdişê zafê dezgahan ê Kurdan ê Almanya de rolêko pîl girewt xo milî û heman wextî de sazkerdişê tayê komeleyan ê Tirkîyayîjî de zî rolêk girewt. Wextêko derg Sendîkaya Zanistî û Perwerdeyî (GEV) de bi hewayêkê aktîfî xebatî kerdî. Baran wextêk pê reyanê zafê kesan Eyaletê Berlînî rê ame weçînayene.