Roja diyîne ya Rayraşîyayîşê Dergî de ciwanê kurdî şaristanê Lehrte yê Almanya ra ver bi şaristanê Celle şîyî.

Rixmê astengkerdişê polîsan ê almanan zî ciwanî qasê 15 kîlometreyan şîyî û çalakîya xo bi qerardarî arde ca.

Ciwananê antîfaşîstan û çepgîran seba ke paştî bidê ciwananê kurdan pankarta bi fotografê gerîlayê PKKyî Agir Stêrkî akerde ke Agir Stêrk serra 2018î de Herêmanê Pawitişî yê Medya de şehîd bi.

Polîsan Celle de wextêk rayraşîyayîş vindarna. Ciwanan nê mîyanî de govend girewt. Polîsan vat tewr zaf 5 kesî eşkenê govend bigêrê ciwanî sey komanê 5 kesan dest pê govend kerd. Polisan xîret kerd ke deyîran qedexe bikerê la ciwanan reyna zî deyîrê xo vatî.

Rayraşîyayîş Celle de qedîya. Dima zî ciwanan plansazîye kerd, sînevîzyonêk  seyr kerd û panelêkê bi nameyê 'asîmîlasyonî' serûber kerd.

Roja 3. ya rayraşîyayîşî do mabênê şaristananê Celle-Unterluessî de dewam bikera.