Buroyê Enformasyonî yê Kursîtanî û Rete Kurdîstan derheqê azadîya Rayberê Şarê Kurdî Abdullah Ocalanî de vizêr paytextê Îtalya de Roma de kombîyayîşê çapemenîye kerd.

Kombîyayîşo ke Merkezê Çapemenîye ya Roma de ame kerdene serekê CPTyî yo verên û garantorê tepişteyanê Îtalya Mauro Palma, rojnameyê La Repubblica ra Marino Bisso, avûkatê Ocalanî Îbrahîm Bîlmez, karîkaturîsto namdar Zerocalkare, senatoro verên û vervatoxê Komîteya Ocalanî rê Azadîye Giovanni Russo Spena û avûkat Simonetta Crisci tewrê ci bîyî.

Kombîyayîş bi prosesê komployî û aktîvîteyê ke semedê Ocalanî yenê kerdene dîya destpêkerdene û sîteyê www.freeapo.org û vîdeoyo ke semedê kampanya ameye amadekerdene dîyayî nasdayene.

Zerokalcareyî vîst vîrî ke ê zî semedê azadîya Ocalanî îmza daya û vat: ''Semedê çareserkerdişê meselaya kurdî ganî Ocalanî serbest bêro veradayene.''

Mauro Palmayî zî vat ê sey serekê CPTyî hîrê rey Ocalan dîyo vat: ''Her vînayîşê ma de Ocalan binê îzolasyonî de bi. Ma cehd kerd ke şertanê ci hol bikerê la çi heyf ke waştişê ma nêameyî caardene. Vera Ocalanî sîstemêko  cîya yeno caardene, îzolasyono tewr pîl yeno kerdene.''

Îbrahîm Bîlmezî zî bala ante tecrîdî ser û vat: ''Ocalan 74 serre yo û 23 serrê zîndanî zafê ci binê tecrîdî ravêrtî. Coka senî ke 40 serrî yo zîndan de bo. Ganî heqê hêvîye bêro şuxulnayene û Ocalan cade bêro veradayene.''

Giovanni Russo Spena zî vat: ''Mehkemeya Roma heqê statuya sîyasîye daye Abdullah Ocalanî. Coka ganî Îtalya berpirsîyarîya xo bîyaro ca û wayîrê Ocalanî vejîyo.''