Roşinvîrê Başûrê Kurdistanî şîyî serdana çalakgeranê Berlînî

Roşinvîrê Başûrê Kurdistanî şîyî serdana çalakgeranê grevê vêşanîye Cemal Kobanê, Omer Bagdûr, Mele Mûstafa Tûzak û Şîyar Xelîlî.

Paytextê Almanya Berlînî de çalakgerê Kurdî Mele Mûstafa Tûzak 126 rojî yo, Şîyar Xelîl 113 rojî yo, Cemal Kobanê û Omer Bagdûr zî 110 rojî yo seba wedaritişê tecrîdkerdişê Rayberê Şarê Kurdî Abdullah Ocalanî grevê vêşanîye de yê.

Çalakgerî çalakîya xo merkezê NAV-DEM'î yê Berlînî de dewam kenê. Grubêk roşinvîranê Başûrê Kurdistanî ra şîyî serdana çalakgeran. Roşinvîrê ke endamê “Civata Rewşenbirî ya Azad”ê, da zanayene ke ê paştdayîş danê xoverdayîşê seba wedaritişê tecrîdê Îmraliyî.

Bi nameyê gruba roşivîran Sîyabend Harîkî qisey kerd û vat, “Bi na çalakîya xo şima teyna nîyê, vengê şima her ca de yeno heşnayene. Ma hêvîdarê ke wextêko kilm de şima do biresê amancê xo.”

Şaîr Ahmet Balayî bale ante serê polîtîkaya înkar û îmhayî ya rejîmê AKP’yî û qalê muhîmîya yewîya Kurdan kerde.