Bi wesîleya serrgêra pancine ya hêrişanê qirkerdişî yê Şengalî, desan bajaran de aktîvîteya deqeyêka hurmetgirewtişî amî kerdene û mîtîngî ameyî viraştene.

Marsîlya: Êzidîyê ke ameyî qirkerdene bajarê Marsîlya yê Fransa de bi çalakîyêka bêvengîye ameyî vîrardene. Çalakîye de bêvengîya welatanê Ewropa zî amî şermezarkerdene. 

Bordeaux: Çalakîya Bourdeauxê Fransa de zî çalakgeran vist vîrî ke qirkerdiş verê çimanê dinya de ameyo kerdene û ame vatene, “cinîyan ê Kurdan qesasê Şengalî girewt.”

Montpellîer: Montpellîerê Fransa de Parkê Peyrou Pitotî rah eta meydanê Comedie rayraşîyayîşêk ame kerdene. Rayraşîyayîşî de vilawekî ameyî vilakerdene û seba Şengalî sloganî ameyî eştene.

Nurnberg: Bajarê Nurnberg ê Almanya de bi heman amacî çalakîyêk virazîyaye. Kurdî pîya bi dostanê xo kewtî meydanan û pîya bi qirkerdişê Şengalî hêrişê îşxalî yê dewleta Tirkî yê Başûrê Kurdistanî şermezar kerdî.

Giessen: Çalakîya bajarê Giessenî bi tewrbîyayîşê bi seyan kesan virazîyaye. Vîrardiş bi rayraşîyayîşî dest pêkerd û beyraqê YPG, YPJ û YBŞ’yî ameyî kiriştene. Rayraşîyayîş de seba Şengalî statu amî waştene.

Bremen: Qurbanîyê qirkerdişê Şengalî bajarê Bremenî de verê Parlamentoyê Eyaletî de ameyî vîrardene. Xeymeyêk amî ronayene û dimayê deqeyêkê hurmetramotişî ra saete 15:00 de verê awanîya eyaletî de mîtîngêk virazîya. Mîtîng de welatanê Yewîya Ewropa û Neteweyê Yewbîyayeyî ra ame waştene ke qirkerdişî nas bikerê û seba muhakemekerdişê çeteyanê DAÎŞ’î mehkemayêka mîyanneteweyîye bêro awankerdene.

Hannover: Bajarê Hannoverî de destpêk de dêrê Martkircheyî de deqeyêka hurmetramotişî amî girewtene. Dimayo ke papazê dêrî qurbanîyî bi vîr ardî merkezê bajarî de rayraşîyayîşêk ame organîzekerdene. Polîsanê Almanan waşt dest bidê serê beyraqanê YPG û YPJ’yî labelê şarî xover da û beyraqî nêdayî.

Stuttgart: Kurdê bajarê Stuttgartî zî pîya bi dostanê xo Rotebohlplatzî de ameyî pêser û Êzidîyî ke hetê çeteyanê DAÎŞ’î ra ameyî qetilkerdene ameyî vîrardene.

Heilborn: Bajarê Heilbornî de zî Kurdistanijî ameyî têhet û kesê ke qirkerdişê Şengalî de ameyî qetilkerdene ameyî vîrardene.

Saarburcken: Bajarê Saarbruckenî de dimayê deqeyêkê hurmetramotişî yê bi serkêşîya Têgêrayîşê Azadîya Cinîyan ê Êzidîyan (TAJÊ) mîtîngêk ame viraştene. Mîtîng de arîya vîrî ke hemverê DAÎŞ’î de şero tewr pîl hetê Kurdan ra ameyo kerdene û dewleta Almanya ra ame waştene ke fek kerdişanê xo yê zordaran ra vera bido.

Vîyana: Paytextê Awusturya Vîyana de bi heman amacî mîtîngêk virazîya. Destpêk de deqeyêka hurmetramotişî amî girewtene û dima ra zî mîtîngêk ame viraştene. Mîtîng de seba tewrbîyayîşê rayraşîyayîşê 10’ê Tebaxe yê hemverê îşxalê dewleta Tirkî yê Rojawanî vengdayîş ame kerdene.

Perth: Bajarê Perthî yê Awusturalya de qurbanîyê qirkerdişê Şengalî bi deqeyêka hurmetramotişî ameyî vîrardene. Fermandaranê YJŞ’yî ra Hîza Qîranî zî bi rayîrê skype tewrê kombîyayîşê vîrardişî bîye.

Den Haag: Bajarê Den Haagî yê Hollanda de seba vîrardişê qurbanîyanê qirkerdişê Şengalî verê Wezaretê Karanê Teberî de deqeyêka rêzgirewtişî amî girewtene. Çalakîye de qirkerdiş ame şermezarkerdene û wezaretî ra ame waştene ke qirkerdişî nas bikero. Dimayê nîmrojî zî Kurdan pîya bi dostanê xo mîtîngêk viraşt.

Luzern: Qirkerdişê Şengalî bajarê Luzernî yê Swîsre de bi rayraşîyayîş û mîtîngêk ame şermezarkerdene. Dimayê rayraşîyayîşê di saetan ke xeylî vilawekî derheqê qirkerdişê Şengalî de ameyî vilakerdene verê awanîya parlamentoyî de mîtîngêk ame viraştene. Mîtîng de bêvengîya dewletanê Ewropa ya hemverê îşxalê dewleta Tirkî amî şermezarkerdene.

Erîvan: Temsîlkarê sazîyanê Kurdan ê paytextê Ermenistanî yê Erîvanî verê peykerê Qirkerdişê Şengalî de cemêyayî û seba kesanê ke qirkerdiş de ameyî qetilkerdene deqeyêka hurmetramotişî girewte. Tîya eşkerayîyêk dîyaye û ame vatene: “Bi nameyê Êzidîyanê Ermenistanî ma wazenê statuya Şengalî yo ke seba ma wareyêko taybet o bêro naskerdene, hêzê pawitişî û îradeyê xorayraberdişî yê şarê Şengalî bêrê qebulkerdene. Ma veng danê Êzidîyanê ke rîyê fermanê peyênî ra erdê pîrozî ra bar kerdê wa agêrê wareyê xo.”