Şaristanê Nurnbergî yê Almanya de seba Rifat Çelebîyo ke babîyê şehîd Huseyîn Çelebî û kedkaranê têkoşînê azadîye ra yew bi, Keyeyê Şarî yê Medya de merasîmê cenaza ame kerdene. 

Hemserekê FED-GELî Saît Ozturk, Hemsereka KON-MEDî Zubeyde Zumrut zî tede xeylêk kesî tewrê merasîmî bîyî. Merasîm bi gulbanê Pîr Alî Ballî û goreyê rîtuealanê elewîtîye ame kerdene.

Hemserekê FED-GELî Saît Ozturkî pare kerd ke Rifat Çelebîyî tim têkoşîn de cagirewt û çîyêk musna ciwanan. Ozturkî vat: ''Ma do wayîrê kede, bedel û têkoşînê Ap Rifatî vejîyê. Wa sereyê Rayber Apoyî, keyeyê ma û şarê kurdî weş bo.''

Hemsereka KON-MEDî Zubeyde Zumrut ard ziwan ke Rifat Çelebîyî seba azadîya kurdan bi serran fedakarîye kerde û qetî verê zulmî de sereyê xo nêardo war. Zumrute vat: ''Ma soz danê Rifat Çelebîyî û pêro şehîdan de heta ke têkoşînê azadîye ser bivinê bixebitê.''

Peynîya merasîmî de loqmayî ameyî vilakerdene. Cenaza ameye berdene bi Cemxaneyê Nurnbergî û tîya de zî yew merasîm ame kerdene.

Cenazaya Çelebîyî Kurdîstan de dewa ci de do bêra definkerdene.