Înîsîyatîfê 'Abdullah Ocalanî rê Azadîye' 2ê teşrîna verêne de roja şemeyî verê Konseya Ewropa de Strasbourg de semedê azadîya Rayberê Şarê Kurdî çalakîyêke do bikero.

Înîsîyatîfî eşkerayîya serê çalakîye de vat ke tecrîdê Îmraliyî hînî resayo astêka tewr pîle û ganî çew vera ci bêveng nêmano. Înîsîyatîfî vist vîrî ke Komîteya Vergirewtişê Îşkenceyî ya Konseya Ewropa (CPT) û Meclîsê Parlamenteran ê Konseya Ewropa (MPKE) raporanê xo de dabi zanayene ke şertê Îmraliyî nênê qebulkerdene û ganî bêrê vurnayene.

Înîsîyatîfî vat: ''25ê adara 2021î ra nata Abdullah Ocalanî reyde têkilîye nêameye kerdene. Ma çarçewa Hemleya Wextê Azadîye de şaristanê Strasbourgî yê Fransa de verê Konseya Ewropa de çalakîyêke bikerê. Ma venga kurdîstanijan û dostanê înan danê kew tewrê çalakîye bibê û azadîya Rayber Apoyî biwazê.''

Çalakîye 2ê teşrîna verêne de saete 13:00 de verê bînaya Konseya Ewropa de do bêra kerdene. Ronayoxê Kampanyaya 'Ocalanî rê Azadîye' Simon Dubbins, Komîteya 'Ocalanî rê Azadîye' ya Îtalya ra  Prof. Laura Corradi, Hemsereka Têgêrayîşê Dostanîya Mabênê Şaran a vera Nîjadperestîye (MRAP) Renee Le Mignot, Serekê Yewîya Pawitişê Azadîyan û Heqanê Mîyanneteweyîyan (AIDL) Dr. Mohammed Al Shami û Temsîlkarê Sendîkaya Solidairesî ya Fransa zî do tewrê çalakîye bibê.