Serrgêra 16’ine ya ronayîşê PYD’yî bajarê Hamburgî yê Almanya de bi aktîvîteyêk ameye pîrozkerdene.

Aktîvîte bi rêzgirewtişê semedê Şehîdanê Azadîye yê Kurdistanî dest pêkerd û dima ra temsîlkarê PYD’yî Fehed Huseyînî qisey kerd. Huseyînî vist virî ke Kurdî wextanê zaf zehmetan ra ravêrtî û va: ’’  Kurdistan hetê çar dewletanê faştîstan ra ame letekerdene û nê faşîstî nêwazenê ke Kurdî bibê îrade. La şarê Kurdî vera polîtîkayanê qirkerdişî bi paradîgmaya azadîye ya Rayberê Şarê Kurdî Abdullah Ocalanî mucadele keno. PYD zî 16 serrî cuwa ver na çarçewe de ameye ronayene û xebatanê xo domneno.’’

Hunermendî Xelîl Xemgîn, Xemgîn Bîrhat, Bengî Agirî, Slava Rojava, Lorens Amûde, Ahmet Şêxo, Koma Agîre Rojava û Koma Wokana Şoreşe zî bi deyîranê xo tewrê pîrozkerdişî bîyî. Reyna Koma Şehîd Xebatî zî pêramotişê tîyatroyî kerd.