Seyîd Riza û embazê ci serkêşîya dezgehanê elewîyan de şaristananê cîyayan ê Ewropa de do bêrê yadkerdene.

Merasîmê yadkerdişî 15ê teşrîna peyêne de şaristanê Cenevre yê Swîsre de, şaristanê Saint-Louisî yê Fransa de, şaristananê Stuttgart, Mainz û Nurnbergî yê Almanya de  do bêrê kerdene. 

Merasîmî hetê FEDA, Konfederasyonê Yewîyanê Elewîyan ê Ewropa, Kongreya Awankerdişî ya Dêrsimî, Federasyonê Yewinanê Dêrsimî yê Demokratîkî yê Ewropa, Komeleya Terteleyê Dêrsimî yê 38î ûsn ra do bêrê serûberkerdene.

Dezgehan derheqê babete de eşkerayîyêka hempare daye û vat: ''Ma sergêra 87ine ya dardekerdişê Seyîd Riza, Wuşenê Seydî û embazanê ci pêşwazî kenê. Dejê ma hema zî teze yê. Çunke polîtîkayê qirkerî dewam kenê.

Dêrsim nasnameyê xo yê kurd  û elewîyî ra raştê xezabêkê pîlî ame. Terteleyê 1937/38î bi rapor, qanûn û qerarnameyan game bi game ame plankerdene. Dima Seyîd Riza, Wuşenê Seydî û Findik Axa, Wuşenê Sey Rizay, Hesenê Civraîl Agaê Arekiye, Aliyê Mirze Sili, Hesenê Îvraimê Qijî rê cezaya îdamî ameye dayene.

La Dêrsimî ancî zî sereyê xo nêard war û do nêaro war. Seke Wuşenê Seydîyî mehkeme de vatbi 'Verê zaliman de sereyê xo mearê war, tîya de komelê kirmancîye yeno muhakemekerdene.'

Seyîd Rizayî zî vatbi 'Ma ewladê Kerbela yê. Şerm o, zulm o, cînayet o.' No tradîsyonê xoverdayîşî ma rê mîras mend. Heta ke dewlete qirkerdişê xo de têrî nêra xoverdayîşê ma do dewam bikero.''