Şaristanê Londonî yê Îngilîstanî de Seyîd Riza û embazê ci serrgêra 84. ya îdamanê înan de hetê Komeleya Kulturî ya Dêrsimijan (Dêrsim-DER) ra ameyî yadkerdene.

Salona merasîmî de fotografê Seyîd Rizayî ameyî daliqnayene, findî ameyî tavistene û qeranfîlî nîyayî ro. Merasîm pê deqayêkê rêzgirewtişî dest pêkerd. 

Dima Yewîya Hêzê Demokratîkî (DGB) ra Dogan Gençî qisey kerd û pare kerd ke ê do sey Seyîd Riza vera qirkeran çok nêşorê erdî ro. Sereka Dêrsim-DERî Şengule Duzgun ard ziwan ke dewlete wazena kurdî Terteleyê Dêrsimî xo vîr a bikerê la ê do qetî ney xo vîr a nêkerê.

Qiseykerdişan ra pey panelê bi nameyê 'Ganî neslo newe senî nêzdîyê mîrasê Seyîd Rizayî bibo' dest pêkerd. Dr. Berfîne Emre û Sekreterê Pêroyî yê Konfederasyonê Yewinanê Elewîyan ê Ewropa (AABK) Erdal Kiliçkayayî panel de qisey kerd.

Dr. Berfîne Emre qala prosesê verê terteleyî kerd û da zanayene ke îdamê Seyîd Riza û embazanê ci sînyalê verênî yê Terteleyê Dêrsimî bîyî. Dr. Berfîne Emre vat: ''Dewleta tirke pê Terteleyê Dêrsimî waşt ke vîranê kurdan ser o hukm bikera. La netîceya nê terteleyî de çêro sey Seyîd Rizayî vejîya werte. Vîrameyîşê Terteleyê Dêrsimî cewabê persê 'Ma kam ê' danê.''

Serekê AABKyî Erdal Kiliçkayayî zî da zanayene ke xetê esasî yê Terteleyê Dêrsimî çi bi û vat ganî meseleya vîrardişî newe ra bêra ercnayene.