Kurdistanijî û dostê înan vizêr reyna şaristanê Stockholmî yê Swêdî, Baselê Swîsre, Kolnê Almanya û Rennesê Fransa de semedê kuçeyan bî.

Stockholm 

Paytextê Swêdî Stockholm de seba wayîrvejîyayîşê grevanê vêşanîye û rojeyê mergî yê ke semedê şikitişê tecrîdê serê Rayberê Şarê Kurdî Abdullah Ocalanî yenê kerdene saetanê şanî de yew çalakîye amî viraştene. Dovîzê ke resimê parlamentera HDP’yî û hemsereka KCD’yî Leyla Guvene û nûşteyê “Ma Sûrîye de DAÎŞ bin fîna, la ma Tirkîya de tepişte yê” û dovîzê ke hêrişê polîsanê Tirkî yê hemverê mayanê grevkerdoxan şermezar kerdêne estbî, çalakgeran kesê ke dormeyê çalakîye ra ravêrtêne derheqê tecrîdî de bi nûştekî û qalkerdişan hayîdar kerdî.

Çalakgeranê ke ANF’yî rê fikrê xo vatî, ard ziwan ke beyanatê Wezaretê Edaletî û selahîyetdaranê Tirkan ê bînan ê derheqê wedartişê tecrîdî de ewiqnayîş û binê nê planî de weçînitişê ameyoxî yê Stenbolî de girewtişê rayanê Kurdan esto, naye ra ame vatene ke heta tecrîd bi temamî bêro wedartene ê do meydanan de bê.

Basel

Şaristanê Baselî yê Swîsre de zî seba wayîrvejîyayîşê grevê vêşanîye û rojeyê mergî çalakîyêk amî viraştene. Çalakîya ke bi vengdayîşê Platformê Paştîdayîşê Grevanê Vêşanîye Barfüsserplatz de amî viraştene de pankarta “Hemverê tecrîd û îzolasyonê serê Ocalanî de aktîvîstanê Kurdan bedenê xo da mergî ser” amî akerdene û fotografê xoverdayoxanê grevê vêşanîye ameyî kiriştene. Çalakîye de tim sloganê ke grevanê vêşanîye û rojeyê mergî rê wayîr vejênê ameyî eştene û dimayê wendişê vilawekanê bi Almankîyan amî qedînayene. Hetêna ra Kurdistanijê ke Swîsre de ciwîyenê vizêr şewe xeylî merkezan ra bi otobusan seba tewrê çalakîya merkezîye ya Brukselî bibê do bikewê rayîr.

Koln

Şaristanê Kolnî yê Almanya de Meclîsê Cinîyan ê Vîyane seba protestokerdişê tecrîdî û paştdayîşê grevanê vêşanîye û rojeyê mergî çalakîyêk viraşte. Çalakîya ke saet 18.00 de Bahnhof Vorplatz de amî viraştene, sazîyêka cimatê sivîlî ya ke hemverê teberbîyayîşê multecîyan de vejêna zî tewrê ci bîye. Qiseykerdişanê çalakîye de derheqê rojeyê mergî û grevê vêşanîye yê bêdemî de rayapêroyîye rê hayîdarîyî ameyî dayene. Hêrişê hêzanê dewleta Tirkî yê Xelfetî û Hewengî yê barbarî ameyî şermezarkerdene.

Rennes

Şaristanê Rennesî yê Fransa de bi vengdayîşê Komeleya Cinîyan a Zîne û Merkezê Cimatê Demokratîkî seba wayîrvejîyayîşê grevanê vêşanîye û rojeyê mergî çalakî amî viraştene. Çalakîye de kîtle sloganê “Ma pêro Leyla yê,” “Bêvengîye vindarnê,” “Biciwîyo Xoverdayîş,” “Biciwîyo Paştdayîş,” “Ocalanî rê azadîye” û “Ocalanî rê azadîye, Kurdistanî rê statu” eştî û vilawekî vila kerdî.