Kurdistanijî  û dostanê înan reyde Stockholmî de  meydanê Sergelstorgî de kom bîyî û şerwanê azadîye û sivîlê ke hêrişê îşxalî yê Dewleta Tirkan ê vera Rojawanî de şehîd bîyî yad kerdî.

Deqayêkê rêzgirewtişî ra dima seba yadkerdişê şehîdanê şorişî û Rojawanî sînevîzyonê fotografanê sucanê ke Dewleta Tirkan vera merdimîye Vakur û Rojhelatê Sûrîye de kerdî ameyî mojnayene. Çalakîkeran bi findan Rojawan nuşt û seba yadkerdişê şehîdan findî vistî ta. Kîşta findan de zî fotografê sivîlanê ke ameyî qetilkerdene nayeyî ro.  Ayşe Goktepe nameyê Meclîsê Cinîyan ê Amara ser o qisey kerd û vat ke armancê Dewleta Tirkan çinkerdişê sîstemê ekolojîk, azadîpawitox, têdûştîye û demokratîkî yo ke Rojawanî de bi rayberîya cinîyan awan bîyo. Goktepe vist vîrî ke Dewleta Tirkan û cerganê aye qirkerdişanê xo de sey fosfora sipîye çekê qedexekerdeyî xebitnayî û venga komelê mîyanneteweyî da ke vera hêrişanê Dewleta Tirkan tevbigêro. Çalakîye de alayê PYD, YPG-YPJyî ameyî berzkerdene û marşê  kurdan ameyî vatene.