Fîlmo dokumenter 'Tearing Walls Down' (Dêsê ke Ganî Birijîyê) Zurich de ame mojnayene. Fîlmo dokumenter qala sîyasetmedaranê tepişteyan Fîgene Yuksekdag, Aysele Tugluk, Gultane Kişanak û Sîbele Yîgîtalp keno. Dîrektorîya fîlmî Hebûne Polat û Şerîf Çîçekî kerde.

Fîlm çarçewa xebatanê Pirdê Wayûbiratîya Zurich-Amedî de ame mojnayene. Zurich de mojnayîşê fîlmî ra dima seyrkeran reyde xoşeberêke ameye kerdene.

Kênaya Gultane Kişanak Evîne Jîyan Kişanak, Sîbele Yîgîtalp û nameyê Pirdê Wayûbiratîya Zurich-Amedî ser o Nurane Tekdag xoşebere de qisey kerd.

Xoşebere de qiseykerdoxan bale ante bêhuqûqîya zîndananê Tirkîya, Dewaya Kobanê, tepişteyanê sîyasîyan ê kurdan, tecrîdê Îmraliyî û hêrişanê vera Kurdîstanî ser.

Hemşaredarê verênî yê Amedî Firat Anliyî zî xoşebere de ard ziwan ke ganî tim paştî bêra dayene tepişteyanê sîyasetmedaran.

Tearing Walls Down hîrê şaristananê Swîsre yê bînan de do bêro mojnayene. Bernameyê mojnayîşî wina yo:

Bern de 30ê teşrîna verêne de, adresê Neubruckerstrasse 8 de, saete 19.00 de

St Gallen de, 31ê teşrîna verêne de, adresê Grunbergstrasse 7 de, saete 18.15 de

Basel de, 1ê teşrîna peyêne de, adresê Klybeckstrasse 247 de, saete 19.30 de