Welatperwerê kurdî Îsmet Tîmurturkano ke şaristanê Limasolî yê Kibrisî de ciwîyeno, seba ke PKK 'lîsteya terorî' ra bêro vetene 10 hezar îmzayî arê dayî.

Tîmurturkanî pare kerd ke o tedaya dewleta tirke ra neçare mend ke 17 serrî verî Kibris de cabibo. Tîmurturkanî îfade kerd ke o bi beşdarîya kampanyaya vera qedexeyê serê PKKyî keno ke xoverdayîşê PKKyî rê paştî bido.

Tîmurturkanî vat: ''Nika cuya mi arêdayîşê nê îmzayan o. Ewro koyan de cinî û camêrdê Kurdîstanî şew û roje xo ver danê. Ganî ma zî yar û neyarî rê bimojnê ke kurdî bi ruhê seferberîye îmzayan arê danê. Qedexeyê vera PKKyî dirîtîya Ewropa eşkera keno. Wexto ke Yewîya Ewropa waştişê dewleta tirke ser o, PKK kerd na lîste pêro kurdî zî sey terorîstan ameyî dîyene. Ê bi nê hawayî wazenê pêro kurdan biqedînê, qirkerdişî temam bikerê. La xoverdayîşo tarîxî yê Rayber Apoyî û têkoşînê PKKyî kayanê Komara Tirkîya û pêro hêzanê hemkaran bin kenê.''

Tîmurturkanî ard ziwan ke ganî şarê kurdî kampanyaya îmzayan sey erkêkê fîrazî bivîno û bi ruhê seferberîye tewrê na kampanya bibo. Tîmurturkanî vat: ''Her nefeso ke ma ewro gênê satê Rayber Apoyî, PKK û şehîdan de yo. Ma prosesê giranî de yê, pawitişê PKKyî û têkoşînê nê erkê rûmetê nê dewrî yê. Ewropa de tewr tay 4 mîlyon kurdî est ê. Hedefê na kampanya zî 4 mîlyon îmzayan o. Ganî pîlkerdişê xoverdayîşê gerîlayan erkê ma yo sereke bibo. Ma na xebate do biresnê armancê ci û pêşkêşê çêranê kurdan bikerê. Roje roja pawitişê namus, şeref û estbîyayîşê ma ya.''