Têgêrayîşê Cinîyan ê Kurdan ê Ewropa (TJK-E) bi eşkerayîyêka nuştekîye pare kerd ke Sûrîye de rejîmo dîktator rijîyayo la dewleta tirke û cergê ci bi giranî hêrişê kurdan û Îdareyê Xoserî kenê.

TJK-E da zanayene ke dewleta tirke nê prosesî xo rê sey firsendêkî vînena coka bi giranî hêriş kena.

TJK-E pare kerd ke Rojawan de bi hemparîya şaran û felsefeya Jin, Jiyan, Azadî Îdareyo Xoser ronîyabi ke ganî no model bipawîyo. TJK-E ard ziwan ke vera îşxal û qirkerdişî çalakîyî do bêrê kerdene û venga pêro kurdîstanijan da ke seba wayîrvejîyayîşê Rojawanî tewrê çalakîyan bibê. 

TJK-E vat: ''14ê kanûne ma sey roja çalakîyanê seba pawitişê Şorişê Rojawanî îlan kenê. Sere de cinîyê kurdî ma venga pêro cinîyan, rayaumûmîya demokratîke û her kesî danê ke tewrê nê çalakîyan bibê. Roje roja pîlkerdişê têkoşînî ya. Roje roja pawitişê Rojawanî ya.''