Vera 8 ajananê MÎTî Almanya tehqîqat akerd

Eşkera bi ke Almanya serranê peyênan de derheqê 8 ajananê MÎTî de tay tehqîqatî dayê destpêkerdene. Dewleta tirke zî seba teslîmkerdişê 48 kesan muracatê Almanya kerd.

Partîyanê muxalefetî yê Almanya ra Partîya Çepe derheqê hemkarîya asayîşî/huqûqî ya mabênê Almanya û Anqara de û derheqê karanê îstîxbaratê Tirkîya û muracatanê serê Interpolî de vernîyazêkê persan pêşkêş kerdbi.

Wekîla Partîya Çepî Sevîme Dagdelen vernîyaz pêşkêş kerd. Hukmatê Almanya 29ê temmuza 2022yî de cewab da vernîyazî. Cewan de ke resayo destê ANFyî goreyê qeydanê Mudirîya Asayîşî ya Federale ya Almanya dewleta tirke 2021 de 291 reyî, 2022 ra heta 15ê temmuze 203 reyî muracatê Interpolî kerdo.

Goreyê heman cewabî dewleta tirke 2021 de Almanya ra waşt ke 79 kesan teslîm bikera. Hukmatê Almanya heta 19ê temmuza 2022yî seba teslîmkerdişê 48 kesan muracat kerdo. Labelê eşkera nêkerd ke nê kesî kam ê û çira teslîmê înan ameyo waştene.

Hukmatî hemkarîya Berlin-Anqara ser o agahîyî dayî. Goreyê ney 2021 de dewleta tirke 463 reyî, 2022 de 300 reyî Almanya ra paştdayîşo huqûqî waşto û bi nê armancî muracat kerdo. Hukmatê Scholzî eşkera nêkerd ke bê paştdayîşo huqûqî çi ameyo waştene.

Cewabê hukmatê federalî de karê îstîxbaratê dewleta tirke zî ameyî eşkerakerdene. Goreyê cewabî 2021 de vera 7 kesan bi gumanê ajanîya Tirkîya tehqîqat ameyo akerdene û kesêk zî na serre ajanîya Tirkîya ra raştê tehqîqatî ameyo. 2020 de zî vera 4 kesan ajanîya Tirkîya ra tehqîqat ame akerdene.

Goreyê texmînan Almanya de 8 hezar kesî MÎTî rê xebitîyenê. Yewîya Tirkan a Îslamî ya Karanê Dîyanetî (DÎTÎB)a ke Almanya de 900 camîyê ci estê şubeyanê tewr pîlan ê Almanya ra yew a. Mala û îmamê DÎTÎBî bi hawayêkê taybetî yenê weçînayene û erşawîyenê Almanya ke ajanîye bikerê. Serra 2017î de wexto ke mabênê Merkele û Erdoganî xiran bibî  derheqê 19 wezîfedaranê DÎTÎBî de tehqîqatêk dîyabi destpêkerdene. Wextê hêrişanê vera Efrînî de zî nê camîyan ra dûayî ameyî wendene. Nê camîyî seke cayê xopawitişî yê DAÎŞî yê.