Paytextê Fînlandîya Helsinki û paytextê Awusturya Vîyana de qirkerdişê Sakîne Cansiz, Fîdane Dogan û Leyla Şaylemez yê ke 9ê çeleyî de Paris de ameyî qetilkerdene bi rayraşîyayîş û nawnayîşî ame protestokerdene.
Helsinki
Bi rayberîya Komeleya Cinîyan a Ronakî û NCDKyî merkezê şaristanî de nawnayîşêk ame serûberkerdene.
Qiseykerdişan de ame îfade kerdene ke eşkera bî ke Qirkerdişê Parisî hetê dewleta tirke û MÎTî ra ame kerdene la hema zî edalet nêame caardene.
Nawnayîş de bi nîzamî sloganê ''Sara, Rojbîne, Ronahî'', ''Cinîye, Cuye, Azadîye'' ameyî vatene, findî ameyî tavistene û qerenfîlî ameyî ronayene.
Viyana
Payextê Awustura Viyana de seba şermezarkerdişê Qirkerdişê Parisî ver bi Konsolosxaneyê Fransa rayraşîyayîşêk ame kerdene.
Bi vengdayîşê Merkezê Komelê Demokratîkî yê Kurdan ê Viyana kurdîstanijî û dostê înan meydanê Opera de kom bîyî û seba yadkerdişê şehîdan deqayêk rêz girewt.
Girseyê şarî bi slogananê ''Kiştox Erdogan'' û ''Şehîdî Nêmirenê'' ver bi Konsolosxaneyê Fransa şî.
Girseyî verê Konsolosxaneyê Fransa de çelengêko reş naro û dima nawnayîşêk da destpêkerdene.
Nawnayîş de ame parekerdene ke qirkerdiş bi fermanê dewleta tirke hetê Omer Guneyî ra ame kerdene û dewleta Fransa têna derheqê Omer Guneyî de tehqîqatêk kerd. Ame îfadekerdene ke heta ke berpirsîyarê rastikênî nêrê eşkerakerdene û hukmkerdene têkoşîn do dewam bikero.
