Bajaranê Biel, Zurih, Aarau, Luzernî yê Swîsre, bajarê Stuttgartî yê Almanya û paytextê Belçîka Bruksel de kurdî û dostê înan vejîyayî kuçeyan û bale ante rewşa tepişteyanê nêweşan û zextanê vera tepitşeyanê sîyasîyan ser.

Biel de kurdîstanijê ke Bahnhofplatz de ameyî têhet şexsê tepişteyanê ke dinyaya xo bedilnaye de  semedê şehîdanê Têkoşînê Azadîye yê Kurdîstanî rêz girewt. Çalakwan pê fotografan û posteran dest bi rayraşîyayîşî kerd û derheqê rewşa tepişteyan de vilawekî vila kerdî.

Zurih de zî kurdan û dostanê înan Meydanê Stauffacherî de bale ante rewşa tepişteyanê nêweşan ser. Çalakîye de ame vatene ke vera tepişteyanê sîyasîyan polîtîkaya zextî yena caardene û ame vengdayene ke wa tepişteyê nêweşî bêrê veradayene.

Aarau de zî bi eynî waştişî kurdîstanijî kuçeyan de bî. Çalakîya ke Bahnhofplatz  de ameye kerdene veng dîya rayapêroyîya Swîsre ke wa semedê rewşa tepişteyanê nêweşan hîsgêr bê.

Luzern de zî bi çalakîyêke bale ameye antene binpaykerdişê heqan ê tepişteyan ser û ame vengdayene ke wa  Aysele Tugluk û heme tepişteyê nêweşî bêrê veradayene.

Bruksel de zî kurdan verê Konsolosxaneyê Tirkîya de bi çalakîyêke bale ante rewşa tepişteyanê nêweşan ser. Çalakîya ke hetê  NAV-BELî û Têgêrayîşê Cinîyan ê Kurdan ê Belçîka ra ameye kerdene de ame vatene ke hukmat wazeno bi zextan kurdan rê çok bido dayene la kurdî çirey milê xo çewt nêkene û semedê veradayîşê tepişteyanê nêweşan ame vengdayene.

Stuttgart de zî bi waştişê veradayîşê tepişteyanê nêweşan verê Konsolosxaneyê Tirkîya de çalakîyêke ameye kerdene. Çalakîya ke serkêşîya Yewîya Cinîyan ê Kurdan a Almanya de ameye kerdene xeylêk cinîyan ê bînan zî paştî daye ci. Çalakîye de ame waştene ke wa heme tepişteyê sîyasîyî cade bêrê veradayene.