Xeylî Bajaranê Fransa de Newroze ameye pîrozkerdene

Kurdistanijanê Fransa teba dostanê xo xeylî bajaran de vejîyayî wareyan û bi şemalan Newroze pîroz kerde.

Kurdistanijanê Fransa teba dostanê xo xeylî bajaran de vejîyayî wareyan û bi şemalan Newroze pîroz kerde.

STRASBOURG: Kurdistanijî bi ruhê xoverdayîşê greva veşanîye yo ke roja 95’ine de yo wareyê Republiqu de ameyî têhet û Newroz a ke sembolê gandarbîyayîş, xoverdayîş û newerabîyayîşî ya pîroz kerd. Girse bi alanê PKK, YPG, YPJ, resimanê Rayberê Şarê Kurdî Abdullah Ocalanî û şemalan heta Place Kleber ray ra şi.  Girseyî  dormeyê adirê Newroze de govende girewte.

BORDEAUX: Bajarê Bordeauxî de zî bi beşdarbîyayîşê bi seyan kesan rayraşîyayîşêko bişemalan ame viraştene û Newroza Rayberê Şarê Kurdî Abdullah Ocalanî, Leyla Guven û heme şarê Kurdî ame pîrozkerdene. Seba pîrozkerdişê roja Yewşeme zî vengdayîşê tewrbîyayîşî ame kerdene.

DRANCY: Newroze banlîyoyê Drancyî yê paytextê Parîsî de rayraşîyayîşê bi şemalan ame pîrozkerdene. Rayraşîyayîş o ke verê banê Merkezê Cimatê Demokratîkî yê Kurdan de dest pêkerd heta verê banê Şaredarîya Drancyî dewam kerd û bi kaykerdişê govendan qedîya.

RENNES: Bajarê Rennesê Kurdistanijan verê Metroya Charles de Gaulle de ameyî têhet heta wareyê Republîque rayraşîyayîş kerd û şehîdê Newroze yad kerdî. Çalakîye de xoverdayoxê grevê vêşanîye ameyî silamkerdene.

EVRY: Kurdê Evryî zî verê Merkezê Cimatê Demokratîkî ra heta Postaxaneyê Grîgnyî bi şemalan rayraşîyayîş kerd. Çalakîye de dowîzê ke derheqe xoverdayoxanê grevê vêşanîye de yê ameyî akerdene.

VILLIERS-LE-BEL: Kurdistanijî teba dostanê xo garê trene yê Vîllîers-le-Belî de ameyî têhet û bi şemalan heta banê Merkezê Cimatê Demokratîkî rayraşîyayîş kerd.

LYON: Bajarê Lyonî de Newroze bi rayraşîyayîşo bişemalan ameye pîrozkerdene. Dezgehanê bi nameyê Assaciation Iséroise des amis des Kurdes, Amitie Kurdes Lyon, Assaciation France Kurdistan, MJCF du Rhône, NPA Rhône paştdayîş da çalakîye.

MANTES LA JOLIE: Banlîyoyê Mantes la Jolîe yê Parîsî de rayraşîyayîşê Newroze de tecrîdkerdişê Şarê Kurdî Abdullah Ocalanî ame şermezarkerdene û xoverdayoxê grevê vêşanîye ameyî silamkerdene.

MARSILYA: Bajarê Marsîlya de Kurdistanijî seba pîrozkerdişê Newroze wareyê Canabîereyî de ameyî têhet û heta Vîeux Portî bi şemalan rayraşîyayîş kerd.