Cemal Kobanê, Omer Bagdûr, Mele Mûstafa Tûzak û Şîyar Xelîlo ke Berlîn de hemverê tecrîdkerdişê Ocalanî de grevê vêşanîye de yê vat ke, “Heta ke tecrîd bi temamî nêqedîyo do xoverdayîş zî dewam bikero.”
Seba qedînayîşê tecrîdbîyayîşê Rayberê Şarê Kurdî Abdullah Ocalanî 4 aktîvîstê Kurdan ê Berlînî grevê vêşanîye de yê.
Çalakwanan ra Mele Mûstafa Tûzak 115 rojî yo, Şîyar Xelîl 102 rojî yo, Cemal Kobanê û Omer Bagdûr zî 99 rojî yo grevê vêşanîye de yê.
Çalakwanan ard ziwan ke halêko rind o ke dimayê 8 serran Rayberê Şarê Kurdî Abdullah Ocalanî eşkayo avûkatanê xo dir pêvînayîş virazo, labelê no nêno a mana ke tecrîd qedîyayo.
Aktîvîstan da zanayene ê paştî danê eşkerayîya tepişteyan a roja Dişemeyî û vat, “Heta ke tecrîd bi temamî nêqedîyo do xoverdayîş zî dewam bikero.”
Tewr peynî grûbêka şorişgêranê Başûrî Kurdistanijî şîbî serdana çalakwanan û vatbi ke ê paştî danê waştişanê xoverdayoxan.
