Çalakîya çarmixkerdişê bi mîlyonan kurdanê bi îradeyê azadî

Nuştoxo yunan Kazacancakîsî romanê ‘Newe ra kewtişê çarmixa yê Îsayî‘ rewna nuşto. La rewşa mi cîya ya. Bi mîlyonan kurdê bi îradeyê azadî yê ke Rayberîya xo rê girêdayeyî, nê hemeyan rê çalakîya çarmixa ameya bicaardene.

Komplo esasê xo de merhaleyê hîsterî de hewayî ra paketêk teqdîmê şovenîzmî kerd, arenaya kayê Romayî ameye amadekerdene ke seserra 20. de şêran rê dayêne werdene. Xayînîyanê tewr pîlan ê seserren ra yew zî hema xo sey dost û hetê azadîye ramojnayêne, êyê ke tewr mazlûmê û layîqê tewirê qehremanîyeyî bêrehm ameyenê çînkerdene û vîrakerdene. Meydan xayîn û hemkaran rê do biameyêne akerdene ke ê tim rewşanê wînayênan de vejîyenê werte.

Eslê xo de her çî goreyê mergî amebi eyarkerdene. Bi giranî waştêne ke fîzîkî eke no mebo bi mana mi biqedînê. Ez texmîn nêkena ke bê nê hedefêk bibo. Komplo hende xorî bîye û bi nêzanayîşan pir bîye ke seba binfînayîşê ci vejîyayîşêkê merdimîye yo zaf aver lazim bi.

Komplo wina amîbî dîzaynkerdene ke êyê ke tewr nizdî bî û dostî bî ser o zî teberê fikrê ‘mergêko bişeref’ de çîyêk nêpawitêne. Mentiqê çaxî no bi. Mentiqê dostî zî û dişmenî zî no bi. Goreyê qaydeyêkê şerî ‘ser o gule varîyayîş’ ez do vajî, rixmo ke no sey heqêq yeno dîyene, no heq zî mi rê nêdîyayêne. Medenîyetî waştêne ke bi yewna hawayî mi ra qesas bigîro.

Mi çirey qehremanîye rê kay nêkerd. Ez wina qaso ke yeno texmînkerdene wayîrê cesaretî nêya, ez wazena ke sey xo bêrî naskerdene la embazê min ê tewr nizdan de zî ez nê rê nêbîya şahid. La hetêk mi bi ke mi do ê rê îxanet nêkerdêne: Ez do sey domanêk ke xeyalanê xo rê îxanet nêkeno bimendêne. Mi do Homayanê medenîyetî nas nêkerdêne, sazîyanê ci de nêvilêşîyayêne û nêbîyêne camêrdê keyeyî yê cinîyanê ci. Halê mi vajê hema hema mi mehkumê Prometheuskarîya hemdeme kerdêne.

Senî Prometheus Koyanê Qafqasya de mehkum bi ez zî kereyanê Îmraliyî de mehkum bîbîya. Çi heyf ke no zî hetê torinanê Homayê Athena Zeusî ra arîyabi mi serre. Moskova kayêkê nimzî seba çend mîlyaran ê ÎMFyî kay kerd û nê ra qe nerehet nêbî.

Roma de bi hesabanê barîyan ê kapîtalîzmê modernî huqûq ameyêne binpaykerdene û bi terorêkê psîkolojîkî mi ser o şerê rûmetî ameyêne ferzkerdene, mi zî çîyo ke lazim bi kerdêne. Athena zî bawerîya ke ci ra dost yeno vatene do bi hawayêkê fahîşetî bikar biardêne û mi bieşrawitêne paytextê Kenya, wareyê merdimweran. Kesê ke tewirêkê cîyayî pawenê heta rastî bi temamî hîs nêkerê nêeşkenê biresê netîceyanê fikirkî û moralî. Mi qedere ra qe bawer nêkerd. La ez do hetê hêzanê qedera ra çarmêxê seserra 20ine ya hemdeme de bêvengîya gorî de biamêyene vindertene.

Îmrali de pawitişî efû karê mi nêyo. Çîyo winayên nêeşkeno bibo cewabê wesf û manaya cuya mi. Mi do seba aşitî îmkananê tewr bisînoran de zî cehd bikerdêne û dima ra tewirê sîyasîyî ser o bivindertêne. Ez do goreyê waştişanê rast û çepê medenîyetî tê nêgêrayêne û xo înan rê nêkerdêne alet.

Mi do her nizdbîyayîşo ke aşitîyêka birûmete rê û azadîye rê xizmet bikerdêne rê paştî bidayêne. Herinda girawanê sîyasîyan ê cîya cîyayan mi do her ‘unîterîyê’, yewîyê ke wayîrê îfadeyê azadî yê tercîh bikerdêne. Sey her wextî senî ke hemverê yewîya bizore de vindertêne, ez do hemverê cîyabîyayîşê bizorî de zî bivindertêne û peymeyê xo yê manîdarî bipawitêne.

Cewherê pawitişanê Îmraliyî no yo. Ez umîd kena ke her roja ke şina ercê ci yeno famkerdene. Eke ma eşkayê terorê serê Tirkîya yê rastekînî tayê vindarnê, menfaatê dormeyanê rantî bikerê tay û eke ma eşkayê ramojnê ke mucadeleyo sîyasî yo demokratîk hîna manîdar o, no yeno na mana ke ma bîyê wayîrê tewirêkê tewr tarîxîyî

Mixê çarmixî; Atîna, Moskova, Roma

Cayo ke ez reya ewilêne ameya çarmixkerdene paytext Atîna ya. Atîna bi qesasêko kor û ruhêko tersanek waşt ke dejê vînkerdişê serdestîya xo ya hîrê hezar serran, mi ra vejo. Gama ke înan vîna ke no mumkun nîyo, ti vanî qey ê wayîrê mi yê, vera tayî tawîzanê Kibris û Egeyî ez sey paketêkê dîyarîye daya hukmatê Tirkî. Îxaneto wînayên tarîxî de çîn o. Atîna sey endamê Yewîya Ewropa vera Peymannameya Heqanê Merdiman a Ewropa (PHME) sucê huqûqî kerdo.

Nuştoxo Yunan Kazancakîsî romanê ‘Newe ra kewtişê çarmixa yê Îsayî‘ rewna nuşto. La rewşa mi cîya ya. Bi mîlyonan Kurdê bi îradeyê azadî yê ke Rayberîya xo rê girêdayeyî, nê hemeyan rê çalakîya çarmixa ameya bicaardene. Yunanî wextê Zeûsî ra xo zaf qurnaz hesibnenî. Serranê 2000î de ez ginaya dame rê. Eke înan mi bikiştayêne xeymê mi de nêbîyêne. La ê senî cesaret kenî ke bi usûlê paketkerdişî ke cayê ci kitabê merdimîye de çîn o û goreyê qeydanê ehleqî nîyo, mabenê dejê 30 hezar şehîdan û hesiranê mayanê şehîdan de, gama ke ez bîna hadre nêbîya û wexto ke krîtîk de, mi teslîm tîmanê taybetî yê şerî yê tirkî bikerî? Peynîya ci de serekê Amerîka Clinton bibiyo. Ey ferman dayo. (Şewîrmendê ci yo taybet Blinkenî no çapemenî rê eşkera kerd). O wext skandalê Monîka estbî û Clinton seba ke nê skandalî ra bixeliso şertê teslîmkerdişê mi yê MOSADî bica ardî. Seba paştîdayîşê Amerîka her çî ame kerdene. Sewbîna kesî cesaretê na komploya bêehlaqî nêkerdêne.

Mixê dîyinî Moskava de ame kuwayene. Naye rê ez bina şaş nêbîya û hêrs nêbîya. Gerrekerdişî zî hend bi mehne nêvînena. Rusî û hukmatê înan yê ke tewr erjayanê xo rê nimz nêzdîbene û nêpawene, înan ra çîyêko biehleqî û merdimî nêpawena. Rûsan o wext eşkera ramot ke seba peran çîyêko feda nêkerî çîn o. Rûsya ke endamê Konseya Ewropa ya pabesteyê Peymannameya Heqanê Merdiman a Ewropa ya. Coka rixmo ke îltacayê mi amebi qebulkerdene, mi bi zorî Rûsya ra eştiş teberê huqûqî yo. No zî Mehkemeya Heqanê Merdiman a Ewropa (MHME) û Yewîya Ewropa (YE) eleqedar keno.

Verê çimanê Papayî de mixo hîrêyîn

Paytexto miqedes ê Ewropa Roma de verê çimê Papayî de mixo hîrêyin ame kuwayene. Ewropa û Roma îddîa kene ke ê medenîyetê dewrî temsîl kenî. Roma ganî çîyêko Saîn Paulî rê ameyo kerdene reyna mekerdêne. 66 rojî senî ke mi sey qefesa asine de tepişî dormeyê mi dê polîsî ca kerdî. Mi waştişê estbîyayîş û azadîya şarêkê tewr verên ê tarîxî yo ke hema nameyê xo zî nêdayo qebûlkerdene û qet heqêkê merdimîye yê ci nêno naskerdene ardêne ziwan. No goreyê qeydanê Ewropa heqêko demokratîk o. Nê heqî rê qet rêz nêame ramojnayene. Seba remnayîşê mi her çî ame kerdene. MHME ganî seba naye Roma ya ke şekil û ruh dayo Ewropa, ci ra hesab biperso.

Kenya de rolê Amerîka

Remnayîşê mi yê paytextê Kenya temamî de bi îradeyê hemkarî yê Amerîka û Ewropa ame kerdene. Gureyo tewr leymin yê komploye eşt Kenya ser û waşt ke bi naye xo pak ramojnê. Vanê qey Ewropa pak bîye û sucê Kenya kerd! Eşkeraya ke Ewropa şiknayişê şaran de zaf tecrube qezenc kerdo. Tîya de rolêko nimz yê celatê sîyasî dayo kaykerdene. Yanî vanê ke Ewropa de gureyo leyşin nêbeno; mîyanê merdimweran de beno!

Kenya de rolê Amerîka eşkera yo. Goreyê mi îstîxbaratê Yunanî û CIAyî na dolabê eşqê Tirkîya ra nêçarnaya. Bêşik o ke sey amecêkê stratejîk înan waşt ke mergê mi destê Tirkan ra bibo. No kayo ke her di hetan zî binê maskeyê dostîye hem Kurdan hem zî Tirkan rê kay kerdê, komployêka nimz a. Ganî Kurdî zî Tirkî zî nê hetê komplo bivînê.

Stratejîya Îsraîlî

Îsraîl dinya de tecrîdkerdiş û teslîmkerdişê mi de rolêko eşkera kay kerdo. Vejîyayîşê mi yê Rojhelatê Mîyanênî û averberdişê Têgêrayîşê Kurdî, înan hetê stratejîkî ra xo rê sey reqîp û tehlûkeyî dîyo. Îsraîl hêzanê hemkaran ê Kurd ê Iraqî esas geno. Rîyê xoser têgêrayîşê mi, cayê hemkaran tengkerdişê mi û sehaya Ereban de zaf mendişê mi ra înan derheqê mi de stratejîya xo aver berde. Ez vana qey seba Îsraîlî ez Arafatî ra zafêr nêna waştene. Îsraîl komploya 9ê Teşrîna verêne ya 1998î de dest eşt mi. Bombakerdişê 6ê Gulane ya 1996î ra xebere û paştîdayîşê înan esto. Mi Moskova ra fetinayîşê serrekkomar Primakuvî pabesteyê Îsraîl û lobîyê Yahûdîyan o. Îsraîl Amerîka ser a zore dayêne Îtalya zî. Beno ke sebebê Ewropa de nêwatişê mi MOSSAD bo. Fermanê teslîmkerdişê mi yê Amerîka zî raştîya Yahûdîyan a.

Mi nê tewirê Îsraîlî tim vecîyayîş de çîyêke ardê sereyê Mûsayî û belka zî sey tewirê merdişî dîyî. Ez tim wazena ke Rojhelatê Mîyanênî ya Demokratîke de cayê şarê Yahûdîyan zî bibo. Reyna tim hêzê zanist, huner û felsefeya Yahûdîyan rê heyranîye û hurmetê mi estbi. Ganî ê her roje hîna hol fam bikerê ke çîyêkê înan mi kerd bi naye ziraro pîl dayo xo. Kurdî bi vînayîşê raştîye do hîna zaf aye bibê, biresê hêzê xo û bide vînayîşî ke ê eşkenî edelat bica bîyarê.

Vuryayîşê komployî yê ver bi haştîya şarî

Ez bi hawayêkê îlegalî ameya destbendkerdene û tepiştene ke na rewşe dûştê îradeyê kurdan û Peymana Heqanê Merdiman a Ewropa (PHME) bibî. Amerîka û Yewîya Ewropa Tirkîya ra zêdêr mesuldarê na rewş ê. Çunke nê dezgehan PHME binpay kerde.

Komployê 9ê Teşrîna Verêne-15ê Sibate netîceya ke komploger û kolonyalîstî tira pawenê do nêdo. Mesuldarîya şarê ma yo ke no komplo bivurno haştîya merdimîye. Tewiro raştikên wayîrvejîyayîşê na mesuldarî yo. No tewir heman wextî de tek rayîrê haştî, biratî, azadî û têdûştî yo.

No metn pawitişê Rayberê Şarê Kurdî Abdullah Ocalanî yê bi nameyê 'Pawitişanê MHME-Dewlete Rahîban a Sumeran ra ver bi Komara Şarî' ame girewtene.