Gule wendênê. Gule bîbî pepug wendênê. Gule bîbî wendîş. Gule bîbî pepuga çolan, wendênê. Ma gule vêreyê birayê xo dirnaybî ke hende wendênê? Ma efsaneye newe bibî? Derdê Gule ne bira, ne waye, ne ma û pî, ne mêrde bî. Derdê Gule welat bî. Hard bî. Hardo ke ser amaybî dinyaye. Hardo ke tê de bibî pîl. Hardo ke pêroyê emrê xo tê de vîyaraybî. Gule şeşt serre bîye. Heta a roje hardê xo ra qet nêvecîyaybî. La nika aye ra vajîyênê hardê xo caverde şo. Aye ra vajîyênê şo ser xete.

Ser xete! 

Ser xete têlê sincikînî bî zerrîyan de çîkîyayî. Her ke zerrî lebetiyênê têlî şîyînê zerrîya bele ra. Zerrî mîyanê gon û goneşîre de mendênê.

Ser xete aşiq û maşuq.

Ser xete dejo xemrî.

Ser xete jano har.

Ser xete bêkes û bêwayîrî.

Tewr giran ser xete bê xîretîye bîye.

Mabênê înan û ser xete rew ra biriyabî. Tenê vayî ê canêverdaybî. Vayê kurî. Tenê va sadik mendbî. Vayo kur ge bi hêrs ameyênê. Ameyêne xo dayênê ruyê înan ê qemerî ra. Rûyê înan o qemer tayê bîn bîyênê qemer. Eke hîs kerdênê vîrî ra şono xo bi xişim dayênê hega û bostanan ra. Hega û bostanî vêşnênê bi şewatê xo yê qeremî. Ge bi nermîya waştî ameyênê can û royê înan vilênênê. Ardênê vîra înan ke ê bajarê sewdaye de yê. Sewdaye xo kerdênê newe. Xo kîşta lewanê waştîyan de, sirotanê domanan ê sûran de kerdênê newe. Bîyênê ya. Sewdaya ke emega çare dayîka de bîye. Germîya destanê pîya bîye.

Nawo Gule ra vajîyênê ti do şorê ser xete. Ma nîya bîyênê? Şîyayîşê Gule ya ser xete nîya bîyênê? Gule qet nîya xeyal nêkerdbî. Gule kotî ra bizanitênê ke rojêk şîyayîşê ser xete hende zerrîya Gule dax bikero. Çeperê zerrîya Gule ra nîya gul û vilanê Gule biqilayno ra.

Gule cayê xo ra wuşte ra. Çend çîyî kerdî zereyê leçega xo ya sûr û kesk a ke ci ra vatênê Çîta Koçeran. Guçikê çîta xo çep rast girêdayî. Êşte hermeyê xo. Ginaye raye ro. Verê xo da berî. Bero ke mabênê têlanê sincikinan de nayîyo ro û resmîyetê dewletanê dagirkeran o. Gule raye ra şîyênê ya raye Gule şîyênê? Gule qudum şîkîyaye reşte keyberî.

Wey la Gule rê! Wele bi sereye Gule! No çik bî? No çi hengame, çi hayleme bî. Çi axir şer bî. Tayê ameyênê tayê şîyênê. Gule verê ke bireso lewê askero ke zewkî ra bibî serxoş xortêde qam mîyanên û qemer o yo ke ser xete ra ameyênê bê hemdê xo gina Gule ra. Bi hêza xortî Gule tayê tepepelkî bîye. Gule hendê bi hêrs bibî ke to vatênê nika biteqo.  Bi ê hêrsî Gule verê xo da xortî çiqas ci ra ame vengê xo kerd berz:

-Hêdî hêdî ma ti ma biwerê.

Xortî çend sanîye rûyê Gule de nîyada. Lacê Gule yo ke kîşta Gule de tersa. Bi ters pawayê xortî mend ka xort çi vajo. Xortî bi bine çiman ra lacê Gule de nîyada, bi vengêde nerm va:

-Dayê seba ke ti ser xete de derg mekerê ez acele kena.