Temsîlkarê Meclîsê Sûrîyeya Demokratîke yê Misirî  Sîhanok Dîboyî rewşa peyêne ya Lîbya, Vilawekê Qahîre û gamanê Misirî yê vera polîtîkayanê îşxalî yê dewleta tirke ANFyî rê ercnayî.

Sîhanok Dîboyî vat: ''Mudaxeleyê dewleta tirke yê Lîbya têna pê Lîbya sinordar nîyo. No mudaxele pêro Vakurê Afrîka eleqedar keno. Polîtîkaya îşxalî ya dewleta tirke têna Misirî rê nê, pêro herême rê gef wanena. Çend rojî verê cû Vilawekê Qahîre ame parekerdene. Uca de têna venga Hafterî nêno dayene. Venga Trablus, Tobruk û Fîzanî zî yena dayene. Warê mîyanneteweyî de Vilawekê Qahîre rê Tirkîya û Qatarî ra ber zaf hetan paştî daye. Dewleta tirke wazena projeyê Îhvan-î Muslîmî herême de serdest bikera.

Ma nêeşkenê vajê ke Misir do Lîbya rê mudaxeleyêkê leşkerî bikero. Misir do giranîye bido prosesê leşkerî. Misir do pê zorî kanalanê sîyasîyan abikero. La dewleta tirke û Hukmatê Mutabaqatê Neteweyî yê Îhavn-î Muslîmî berê îhtîmalan ê bînan akenê. Şer zî nê îhtîmalan ra yew o. Dewleta tirke huqûqê mîyanneteweyî binpay kena û pêro hêzê herême zî goreyê her senaryo amadekarîya xo kenê. Gamê nikayênî yê Tirkîya manenê gamanê peyênan ê Osmanijan.

Dewleta tirke Rojhelatê Mîyanênî û Afrîka rê zî pê sîyasetê şerî gef waneno. Wazena nê cayan de Îhvanîye vila bikera.  Dewleta tirke û Qatar tewirê xo ra fek vera nêda. Dewleta tirke wazena pê projeyê Îhvan-î Muslîmî dormeyê Misirî bigêra. Misir pê nê projeyî hesîya.''