Hûmara verêne ya Kovara Hawarî 15ê gulana 1937î de hetê Mîr Celadet Elî Bedirxanî ra paytextê Sûrîye Şam de weşanîyaye. Na roje zî sey 15ê Gulane Roşanê Ziwanê Kurdkî her serre yena fîrazkerdiş. Kovara Hawarî bi kurmanckî, kirdkî û sorankî weşanîyaye û tede Celadet Elî Bedirxan, Rewşane Bedirxan, Dr. Kamûran Elî Bedirxan, Osman Sebrî, Qedrîcan, Cegerxwîn, Mustafa Botî, Dr. Nuredîn Zaza, Lawê Fendî, Ehmed Namî, Hasan Hişyar, Bişarê Segman, Nêravan, Reşîd Kurd, Tevfîk Vehbî, Şakir Fettah, Hevîndê Sorî, Lawêkî sey nuştox ca girewt.

Mîr Celadet Elî Bedirxan kovare de bi nameyanê cîya-cîyayan nuşteyî nuştî. Celadet Elî Bedirxan çekuya 'xonaskerdişî' û çekuya 'ziwan' tim têdir xebitnayî. Goreyê Celadetî rayîrê xonaskerdişî rayîrê ziwanî ra derbaz beno û înanê ke ziwanê xo vîn kerd firsendê xonasnayîşî zî vînî kenê.

Weşanîyayîşê hûmara verêne ya Hawarî ra zaf serrî vîyartî. Ê wextî ra nata kurdkî her roje hîna zêde nêzdîyê vînbîyayîşî bena. Deskewteyanê dinyaya tekonolojîke ra dima kurdkî hînî têna kovaran de nê zaf platforman de ca gêna. Ma eşkenê bi asanî vajê ke kurdkî hînî zêdêr nusîyena la tayêr şuxilîyena. Kurdê ke mîyanê na nakokîye de fatisîyenê her serre 15ê gulane de seke gunayê xo fetilnenê der û dor pê kurdkî kenê pir. Bi nê hawayî nakokîyêke nakokîyêka bîne ana werte. Kurdê têna rojêke xo nas kenê û ê rojanê bînan ê serre de sey ruhî têgêrayenê.

Eliezer Ben Yehuda musevîyêk bi. Eliezer o merdimo ke ziwanê îbrankî newe ra ganî kerd. Ê çaxan de îbrankî ziwanêkê sînagogan bi û hetê tay kesan ra şuxilîyayêne. Eliezerî bi serran xîret kerd, îbrankî ser o xebitîya. Wextêk her kesî reyde têna îbrankî qisey kerd. Xem nêkerdêne ke kesanê ke tede qisey kerdêne îbrankî zanayêne yan ney. Têna bi sereyê xo kovarî vetî, şi Îsraîl û uca de perwerde da şar, zanîngeh de mamostatîye kerde. Ronayîşê Dewleta Îsraîlî ra 26 serrî verê cû merd la bingeyê îbrankî xurtî ra amade kerdbi. Eliezerî ziwanêk destê çinbîyayîşî ra xelisna û na destê şarê xo.

Eke destê şarêkî ra ziwan şêro her çi hînî êdî êdî şino. Bêguman Eliezer, Mîr Celadet Elî Bedirxan, Malmîsanij wayîrê na hîşmendîye bîyî. Ma çewî ra nêheqîye mekerê, kurdî zî wayîrê na hîşmendîye yê. Pêro kurdî zanenê ke ziwan çend girîng o, seke parçeyê leşê merdiman o. La problemê kurdan no yo ke seba ke ziwanê xo destê çinbîyayîşî ra bixelisnê çîyêkê bitesîrî nêkenê. Wexto ke babete bêra çinbîyayîşê ziwanî ser o kurdî tim dewlete sûcdar kenê. Xora dewlete sûcdarêka verêne ya. La no zî yew psîkolojîya kurdan o ke pê sûcdarkerdişê dewlete zerrîya xo kenê rehet. Kurdî xo peyê vatişê ''Dewlete ma asîmîle kerdî'' de nimnenê. Dewlete dewlet a. Dewlete kişena ganî nêkena. Gereka şarê ma dewlete ra çîyêk nêpawo. Ziwan ziwanê ma yo.

Hînî bîyo kurm ke rojanê sey Roşanê Ziwanê Kurdkî de kurdî yenê pêser û seba kurdkî çareserîyan pêşkêş kenê. Eke merdim bala xo bido ser vîneno ke her serre heman çareserîyan ser o yeno vindertiş. Çunke rewşe nêvurîyena ke çareserîye yan zî ma vajê reçeteyî bivurîyê. Çîyê ke ganî bêrê kerdiş eşkera yê, werte de yê. Ziwanêk pê qiseykerdiş pawîyeno. Sewbîna çareyêke çin a. Merdimê ke bi ziwanê xo qisey nêkerê senî do estbîyayîşê xo, kulturê xo û naskerdişê xo bipawê?

Bêrê her roje tewr nêbo saetêk kurdkî qisey bikerê! Eke der û dorê şima de çew çin o, kitabêkê kurdî abikerê û pê vengêkê berzî biwanê. Vîrameyîş û serebûtanê xo, hîkaye, mesel, estanikanê ke şima zanenê xo bi xo bi vengêkê berzî vajê. Eke der û dor de çew esto ke şima tede kurdkî qisey bikerê înan reyde têkilîya xo xurt bikerê. Bializê ziwanê xo, xo nas bikerê. Domananê xo reyde kurdkî qisey bikerê. Ziwanê ma ziwanê medenîyet, kultur, zanist û îlmî yo. Eke şima bifikirê ke nêeşkenê tay çîyan kurdkî îfade bikerê yanî ziwanê xo qîm nêvînê hîna xelasa şima çin a.

Rayîro ke Celadet Elî Bedirxanan, Osman Efendîyo Babijan, Mela Ehmedê Xasîyan, Malmîsanijan akerdo gereka pê heman hîşmendîya nînan bêro teqîbkerdiş. Kedanê ke heta nika seba kurdkî dîyayê mîrasêko pîl verda û no mîras pabeyê kurdanê ke bi kurdî qisey kenêyo.