2006î ra dima cezayê hucreyî yê bi nameyê 'îşkenceyê sipî' normalîze bîyî. Rayberê Şarê Kurdî Abdullah Ocalanî 12ê temmuza 2016î de pêvînayîşê avûkatan de vat ke 'Seba çareserî û haştîye ganî verê sîyasetkerdişê PKKyî bêro akerdene.' Dima dest nîya radyo, rojname û kitabanê ey ser. Ci rê cezaya hucreyî ya 20 rojan dîyaye. Ocalano ke cara hucre de bi, 20 rojan mabênê dêsan ê sipîyan de tena ame veradayene.

Ocalanî Heyetê Dîsîplînî yê Zîndanî rê pawitişê xo nuşt û da zanayene ke ê do fikranê xo binê her şertî de reyna vajo: ''Eke rayîrê çareserîye nêro mojnatene tengîyî do senî biqedê? Seba ke xelet nêro famkerdene ez do vatişê fikranê xo ra fek vera nêda.''

Girseyî: Ocalan îradeyê ma yo sîyasî yo

Nê rojan de kurdan beşo yewîn ê kampanyaya 10 mengan temam kerdêne. Netîceyê Kampanyaya 'Ocalan îradeyê min o sîyasî yo' ya ke temmuza 2005î ra heta gulana 2006î Tirkîya û Kurdîstan de hetê Têgêrayîşê Hemwelatîyan ê Azadan ra amebî caardene, 20ê teşrîna verêne ya 2006î de Anqara de bi kombîyayîşêkî ameyî eşkerakerdene. Rixmo ke bi seyan aktîvîstê kampanya ameybî destbendkerdene 3 mîlyon û 243 hezar kesan kampanya îmza kerde.

Dima nê îmzayî 10 mîlyonî ra zêdêr bîyî. Têna na kampanya nê seba azadîya Ocalanî û wedaritişê tecrîdî 2 kampanyayê bînî yê pîlî zî ameyî kerdene:

-Zîndananê Kurdîstan û Tirkîya ra tepişteyan 10ê kanûna 2001î de startê Kampanyaya 'Pawitiş û Wayîrvejîyayîşê Rayberîye' da. Çarçewa kampanya de tepişteyan grevê vêşanîye kerd, pêvînayîşî nêkerdî û nêşîyî revîran. Kampanya dima Ewropa, Kurdîstan û Tirkîya de pê rayraşîyayîşan û eşkerayîyanê çapemenîye dewam kerd. Kampanya 15ê sibata 2003î de zî qedîyaye.

-Rayberîya Têgêrayîşê Ciwanîya Azade (BAGEH) de 1ê sibata 2004î de Kampanyaya 'Rayberîye rê Azadîye' dîyaye destpêkerdene û 1ê gulana 2004î de kampanya qedîyaye. Çarçewa kampanya de bi se hezaran îmzayî ameyî arêdayene û Meclîsî rê ameyî teslîmkerdene.

Îdareyê neweyî dewre de yê

Dewleta tirke zî vera nê kampanyayan metodê neweyî ceribnayî. Serra 2007î de bi îxtîmalo ke Ocalan pê jehrî kewto gijikê ci ra tay numûneyî erşawîyayî laboratuwaranê Swêd û Îtalya. 1ê adara 2007î de paytextê Îtalya Roma de netîce ameye eşkerakerdene.

Gijikê Ocalanî de zêdêr krom û elementê stronsîyumî estbi û na rewşe cuya ey vistêne binê tehlukeyî. Bi kilmî ame eşkerakerdene ke Rayberê Şarê Kurdî pê jehrî kewtbi. Naye ra dima kurdan pêser eşkerayîyî dayî. Murat Karayilanî da zanayene ke boyaya odaya Ocalanî hetê fîrmayêka terefgîranê MHPyî ra ame kerdene û Rayberê Şarê Kurdî boya ra pê jehrî kewto. Karayilanî ard ziwan ke derheqê na mesele de destê ci de delîlî estî.

Weşîya ci weşîya ma ya!

Rayaumûmîya waştêne ke heyeto xoser şoro Îmrali û cigêrayîşan bikero la dewleta tirke nê waştişî rê reaksîyonêk nêdayêne. Bi nê hawayî sere de Ewropa de her cayê dinya de kurdîstanijî vejîyayî meydanan û înan vat 'Weşîya ey weşîya ma ya.' Kurdan waştêne ke vera jehrbîyayîşê Ocalanî bêro têgêrayene. Dima ke Yewîya Ewropa, Konseya Ewropa û Mehkemeya Heqanê Merdiman a Ewropa ra zî veng nêvejîya şaristanê Strasbourgî yê Fransa de 11ê nîsana 2007î de 18 sîyasetmedar û aktîvîstanê kurdan dest pê grevê vêşanîye yê bêdem-bêagêrayîşî kerd.

Pê ciwîyayîşî xo ver bidê!

500 kesan zî bi grevê dore paştî daye grevê vêşanîye. Roja 39. ya grevî de Rayberê Şarê Kurî mesajê 'Pê ciwîyayîşî xo ver bidê' erşawit û grev qedîya. Nê mîyanî de 8 wekîlanê Parlamentoya Ewropa seba ke Ocalan hetê heyetêkê xoserî bêro weşkerdene kampanyaya îmzayan daye destpêkerdene. Hewteyêk de 103 hezar û 417 îmzayî ameyî arêdayene. Heyetê Îdareyî yê Komîteya Vergirewtişê Îşkenceyî (CPT) bire daye ke Îmrali rê heyetêk bierşawo.

Heyetê CPTyî 19-22ê gulana 2007î de şi Îmrali û dewleta tirke derheqê weşîye û tecrîdî de şîret kerde. La dewleta tirke şîretê CPTyî peygoş kerdî û konseptê 'mergê bi serran' dewam kerd. Ê rojan de Heyetê Pêroyî yê KONGRA-GELî yê 5. kombîyayîşê xo de vurîyayîşê modelê rêxistinbîyayîşê Têgêrayîşê Azadîye yê Kurdîstanî vurna.

Ronayîşê KCKyî

Çar parçeyanê Kurdîstanî û dîaspora ra 213 delegeyî tewrê ê Heyetê Pêroyîyî bîyî. Netîce de nameyê Koma Komalanê Kurdîstanî (KKK) sey Koma Komelanê Kurdîstanî (KCK) vurîya. KCKyî pêro parçeyî do temsîl bikerdêne. Ocalanî ê rojan de no sîstemo newe wina pênase kerd: ''Sîstemê KCKyî sîstemo dîyalektîk û komelkî yo demokratîk o. Kurdî bi hîşmendîya neteweya demokratîke têgêrenê. KCK pêro kurdan temsîl keno û û her parçe de nameyê kurdan ser o polîtîka keno. Ez vana qey sey serekê rûmetî înan ez weçînaya. Ez hînî eşkena nameyê Serekê KCKyî ser o pêvînayîşan bikera. Xoserîya demokratîke sîyasetê demokratîkî, komelê demokratîkî û komara demokratîkî ser o awan bena. Ne polîtîkayê faşîstî yê neteperwerî ne zî îslamo sîyasal eşkenê meseleya kurdan çareser bikerê. Xoserîya Demokratîke tek çareserî ya.''

Îlanê KCDyî

Çarçewa nê rêxistinbîyayîşê neweyî yê Rayberê Şarê Kurdî de 30ê teşrîna verêne ya 2007î de Amed de Kongreya Komelê Demokratîkî (KCD) ameye îlankerdene. Pêro rêxistinê komelê sivîlî dormeyê KCDyî de kom bîyî. Beyannameyê KCDyî de ame waştene ke Ocalan sewqê cayê bînî bibo, meseleyê weşîya ci bêrê safîkerdene, meclîsê heremî bêrê ronayene û Xoserîya Demokratîke bêra caardene.

Hînî bes o!

Nê rojan de Ocalanî rê pêser cezaya hucreyî ameyêne dayene. Weşîya Rayberê Şarê Kurdî binê tehlukeyî de bîye. 11-16ê êlula 2007î de rojdemo verên ê KONGRA-GELî cezayê dîsîplînî û xirabîya weşîya Ocalanî bi.

Delegeyan qiseykerdişê xo vera tecrîd û îşkenceyî bi vatişê 'êdî bes e' (Hînî bes o) qedînayêne. Nê tewirî xeylêk tesîrê girseyan kerd. Kongre ra bira Kampanyaya 'Êdî bes o, Rayberîye biciwîyê, bipawê' ameye dayene. Kongre pare kerd ke heta ke Rayberê Şarê Kurdî Zîndanê Îmraliyî rê bêro neqlkerdene û cuya ci bêra girewtene binê garantî kampanya do dewam bikera.

Pêvînayîşê Bush û Erdoganî

Kurdîstan de şer payîzê 2007î de newe ra bibi giranêr. Gerîlayan şewa 21ê teşrîna peyêne Oremar de eşt taburê komandoyan ê artêşa tirke ser. Nê sereştişî ra dima hêzanê globalan û Tirkîya bale xo daye Kurdîstanî ser. 5ê teşrîna peyêne de Erdogan û Serekê DYA yê ê çaxî Bushî pêvînayîşêk kerd. Rojdemê Erdoganî 'têkoşîno hempar ê vera PKKyî' bi. Pêvînayîşî ra dima seba tasfîyeya PKKyî asta globale de prosesêkê neweyî dest pêkerd û dewleta tirke zî Îmrali de îşkence û tecrîdo tewr giranêr vist dewre.

Metodê neweyî yê îşkenceyî

Dewleta tirke serra 2008î de metodê îşkenceyî yê tewirekî Îmrali de vistî dewre. Hêzanê dewlete hezîrana 2008î de bi zorî gijikê Ocalanî qesna. Ocalanî derheqê mesele de avûkatanê xo rê wina qisey kerd: ''Bi nê hawayî wazenê vajê ke 'to binê kontrolê ma de yî.' Mi vat kerdişê şima dûştê qaîdeyan o. La înan vat ê mecbûr ê ke biqesnê.''

Cezayê dîsîplînî zî sey rayîrê gef û qesasî hamnanê 2008î de bi hawayêkê giranêrî ameyî caardene. Menganê gulan-hezîrane de cezaya hucreyî dîyaye Rayberê Şarê Kurdî. Rayberê Şarê Kurdî avûkatanê xo rê ard ziwan ke mudirê Îmraliyî tira vato ke cezaya hucreyî do dewam bikera. Gijiko ke amebi qesnayene verê çimanê Ocalanî de ame vêşnayene, mazgalê berî hetê personelan ra tim ameyêne akerdene û padayene ke wa wendiş û rakewtişê Ocalanî asteng bikero. Heman pêvînayîşî de Rayberê Şarê Kurdî nê ercnayîşî kerdî: ''Vizêr derheqê warê hewayî de meseleyêke virazîyaye. Mudirî vera mi vengê xo kerd berz. Wazenê hetê psîkolojîkî ra mi çin bikerê. Mi mudirî rê vat ke seba nê meseleyanê qijan ganî wina nêkero. Mi vat şima çekêke ronê mi, ez vengê xo nêvejena la çîyê winasênî mekerê.''

Kerdişê bêmerdimîye yê vera Rayberê Şarê Kurdî têna nê çîyî nêbîyî. Seba ke milçîkî nêrê û nêwanê dormeyê hucreyî de pêro darî ameyî birnayene. Pêvînayîşê 19ê teşrîna peyêne ya 2008î de Rayberê Şarê Kurdî wina qala na babete kerde: ''Çira nê darî birîyayî? Ê tehamul nêkenê ke ez darêke zî bivîna. A roje reyna înan odaya mi serûber kerdî. Pêro mektub û dokumentê mi raşayî. Layêke nêverdaye ke ez pê mektubanê xo besta. Heta ke mi a têmîyanîye kerde raşt mi de hal nêmend. La eke ez teslîm bibîyêne înan do çirey wina kerdêne?''