Xopawitiş

Azadî bi xopawitişî bena. Xopawitiş hêzê merdimî yo bi xo yo. Merdimî binê pawitişê yewnayî de azad nêbenê. Xopawitiş sey Zîlane xo mezgê dişmenî de teqnayîş o. Biqîrayîş vatişê ma estbîyê, estê, do bibê yo.

Sîstemo ke serdestîya camêrdî ser o ronîyayo cinîyan tim zereyê cimatî ra vejeno yan zî gama ke tewrê wareyanê cimatkî keno înan ser o ferz keno ke vînayîş û mezgê serdestîya camêrdî sey koleyêk qebûl bikerê.

Cinîya ke camêrdî bi xo ana dinya hetê ci ra raştê hêrişî yena. Sîstemê cemêrdî cinîyan rê rolê koletîye fasilnayo la cinîya ke ruhê ci de xoserîye esta hela ke sere wedarena û bena şerwane rindêr bena û ûmidê cuya pîlêr kena.

Tarîxê cinîyan bi fikir, kede, fedakarî û cesaretêkê pîlî yeno nûştene. Cinî her çikas dinyayêka bêçeke biwaze zî  seba ke linganê xo ser vindere û her hetî ra xo bipawe mecbura ke çeke bido doşê xo. Cinîyê kurdan ê ke çeke gênê  xo dest û koyanê azadan de erd û şarê xo pawenê hêzê danê heme cinîyan û ramojnenê ke cinîyî eşkenê her çî bikerê.

Nê cînîyê şerwanê ke çend şer kenê azad benê, çend azad benê rindêr benê, û çend rindêr benê zafêr yenê heskerdene têna xo nê herre, xoza, şar, kultur, nasnameyê xo pawenê û  semedê ardişê cuyeya azade têkoşîn danê. Xopawitiş heqo tewr bingêyen o ke ewro sere de koyanê Kurdîstanî de cinîyî zaf cayan de şuxulnenê.

Xopawitiş sey Zîlane xo mezgê dişmenî de teqnayîş o ke bi na çalakîye Dêrsimo ke sembolê têkoşînê Besêyan û Zarîfeyan o ra  dewrêko newe yê hesabpersayîşî ame destpêkerdene.

Zîlanbîyayîş, mezgê kolonyalîzmî û yê sîstemê serdestî yê camêrdî de bi teqayîşêko îdeolojîk, bi estbîyayîşê bi xopawitişî, heman wextî de bi îdîa û qerarê afernayîşê sîstemê cimatê azadperwerîya cinî. 

Terso ke aye verada zereyê kolonyalîzmî seba cinîyan ê kurdan û heme cinîyan ê xoverdayoxan bi çimeyê cesaretî. Zîlana ke dewrê xo de tam wext de tehlukeyî dîyî û bi çalakîya xo mudaxele kerd, têna dewrêk rê nê, tarîxî rê serkêşîye kerde.

Ewro zî îqtîdaro faşîst înkar û îmhakerdişê kurdan û qirkerdişê cinîyan hîna kerdo pêt ke nê hêrişî bi hemkarî û îxanetî yenê kerdene. Gama ke her tewir hêrişê dişmenî û na xeta komplokare û îxanetkare bêro binfînayene do vengdayîşê Zîlane bireso meqsedê xo.

Azadî bi xopawitişî bena. Xopawitiş hêzê merdimî yo bi xo yo. Merdimî binê pawitişê yewnayî de azad nêbenê. Rewşa winayêne de merdimî têna benê kole. Eke ma wazenê ke azad bê o wext ganî ma xo bipawê.

Xopawitiş dostan rê sey gule  boya weşe dayîş û telîyê xo dişmenî  ro kuwayîş o. Xopawitiş biqîrayîş vatişê ma estbîyê, estê do bibê yo.