Çewlîg û dormeyê ci ra 50 komele û federasyonan bale ante serê qirkerdişê heywananê koyîyan û semedê hîsgêrîye veng da.

Eşkerayîye de ame vîrardene ke semedê pezkovîyan îhale amebi destpêkerdene û badê nêrazîbîyayîşan ame betalkerdene û ame vatene: ''Rixmê nayî 9ê kanûne de herêma Selenkî ya Gêxî de pezkovîyêke ameye qetilekerdene. Aktîvîstê xoza yo ke gerreyê nayî kerd vat leşkeran ey ra vato do hema hîrêna pezkovî bêrê kiştene. Xora rîyê HES û awbendan ra heywanê koyîyî tengayî ancenê, awe de xeniqyenê. Wa no nêro vîrakerdene peynîya cuya xoza do bibo peynîya heme ganîyan. Ziraro ke dîyeno ekolojîya herêma ma hînî bes o. Wa heywanê ke wayîrê raştîkên ê Dola Pêrî ya bimbareka ma yê rê dest nêro padayene.''

Peynîya eşkerayîye de veng dîya heme dezgehan û rêxistinanê komelê sîvîlî yê hîsgêran ke wa qirkerdişê heywanan rê vajê nê.