Aktîvîstê xoza Yunus Gurbeyo ke qezaya Gêxî ya Çewlîgî de ciwîyeno da zanayene ke Çewlîg de pezkovîyî yenê mirênayene.

Gurbeyî cayo ke pezkovîyî yenê kiştene dîmenê ci pare kerdî. Dimenan de yeno vînayene senî gonîya peskovî serê vewra de rişîyaya. Gurbeyî ard ziwan ke çar seydwanî teberê herême ra ameyî û vera naye hêrsê xo ard ziwan. Gurbeyî vat: ''Na herre de pezkovîyî bimbarek ê. Nika bi îhaleyan pezkovîyan kişênê. Gama ke ma derheqê na mesela de selahîyetdaran reyde qisey kerd înan vat do hema hîrê peskovîyî bi tewirê îhale bêrê mirênayene. Rixmo ke vera ci şar nêazîbîyayîşî ramojeno zî seydwanîye dewam kena. Ganî heme hemwelatîyî vera naye hîsgêr bê û vera nê qirkerdişî veng vejê.''