Serra 2015î de sînorê Dêrsim, Çewlîg û Xarpêtî de awa Pêrî ser o hetê Holdingê LIMAKî ra Awbendê Pembelîkî û HES virazîyayî. A roje ra nata awbend û HESî benê sebebê xeniqîyayîşê pezkovîyan. Awbendo ke rayîrê koç û kelwerdişê pezkovîyan ser o ronîya têkilîya dewan zî yewbînan ra cêra kerde. Pezkovîyê ke hema zî hema rayîrî xebitîyenê kewenê awe û tede xeniqîyenê.

Platformê Pawitişê Awa Pêrî û Platformê Pawitişê Xozaya Arhavî vera mesele nêrazîbîyayîşê xo mojna.

Platformê Pawitişê Awa Pêrî bi eşkerayîyêke îfade kerd ke nê projeyê rantî Gelîya Pêrî de qirkerdişê ekolojîkî kenê û pêro gandaran ceza kenê. Platformî seydwanîya pezkovîyan viste vîrî û venga dêrsimijan û keyeyan da ke vera nê seydwanan hîşyar bibê. Platformî waşt ke ganî cade selahîyetdarî vera xeniqîyayîşê pezkovîyan tedbîran bigêrê.

Platformê Pawitişê Xozaya Arhavî zî medyaya dîjîtale ser o wina vat: ''Medya de eşkera bi ke seydwanê amerîkayîjî rê seba pezkovîyan 'destûro taybet' ame dayene. No destûr nêrazîbîyayîşan ra dima ame betalkerdene. La pezkovîyî nika zî benê qurbanê patronan ê herêmîyan.''