Mudirîya Pêroyî ya Parkanê Pawitişê Xoza û Parkanê Mîllî semedê seydwanîya pezkovîyan ê ke Dêrsim de bimbarek hesibyenê û sey ''Bizanê Xizîrî'' yenê namekerdene, destûr da yew nameyê amerîkayîjî.

Merkezê Cigêrayîşanê Dêrsimî (DAM) derheqê babetê de hesabê xo yê medyaya sosyale de eşkerayîye daye. Eşkerayîye de nê ameyî parekerdene:

''Mudirîya Pêroyî ya Parkanê Pawitişê Xoza û Parkanê Mîllî îhaleyê xo ye vera seydwanîya pezkovîyan ê ke Dêrsim de bimbarek hesibyenê û sey ''Bizanê Xizîrî'' yenê namekerdene, badê nêrazîbîyayîşan peyser antbi. La înan nika semedê seydwanîye destûr dayo seydwanêkê amarîkayijî. Goreyê nê destûrdayîşî Bradley Garrett Van Hooseyo amerîkayîj Salordek de mabênê 7-13ê kanûne de semedê mirênayîşê pezkovîyêk do vejîyo seyd. Şarê Dêrsimî qerqilîyeno ke bi nê desturî qirkerdişê cuya tebîî dewam keno.''