Rixmo ke hewteyêk xo pey de verdayo şewwatê Cûdîyî hema zî dewam keno. Hêzê dewlete qestî ra mudaxeleyê vera şewatî yeno astengkerdene.

Hemşaredarê Cizîre Mehmet Zirigo ke herinda ci de qeyûm amebi tayînkerdene, derheqê babete de ANFyî rê qisey kerd.

Zirigî dîyar kerd ke herêma Cûdîyî de dekewtiş-vejîyayîş qedexe yo, baregehê leşkeran zî uac de yo û îmkanê înan çin o ke derheqê şewatî de agahîyan bigêrê.  Zirigî vat: ''Şewat bi temamî nêgêrîyayo binê kontrolî. Herême de bi desan qereqolî est ê la dekewtiş-vejîyayîş qedexe yo. Goreyê agahîyanê ke dewijan dayê ma şewatî dewa Sorbitme de dest pêkerdo. Na dewe 1990 de amebî vengkerdene. Seba ke şewat zaf vila bîyo ma nêeşkenê derûdorî ra xebere bigêrê. Serranê peyênan de tim wina şewat vejîyeno. Vanê 'adiro ke nêno hewnakerdene.' La mudaxele nêno kerdene. 

Roja verêne ya şewatî de ma pêro selahîyetdarî agahdar kerdî la çewî muadaxeleyê şewatî nêkerd. Na herêma şewatî de darî qestî ra ameyêne birnayene, tede ocaxê kerrayan û şîrketê petrolî est ê. A raşte sebebê şewatî yo verên nê yê. Cûdî, Gabar û Besta de konseptê asayîşê leşkerî yeno caardene. Qestî ra darî birîyenê û qestî ra şewatî yenê vetene. Serranê peyênan de Gabar û Cûdî de zaf ocaxê komir û kerrayan ameyî akerdene û tede şîrketî gêrenê petrolî.''

Zigirî bale ante dirîtîya dewlete ser û vat: ''Dewlete hetêkî ra Cûdî de festîvale serûber kena û uca sey 'herêma asayîye' îlan kena. Ma ra ber çew seba cografyaya ma xîret nêkeno, tênêgêreno. Rayaumûmîye seba Akbelenî bîye yew veng. La rixmo ke bi serran o Kurdîstan warê şerî beno rayaumûmîye ci rê vengê xo nêkena.''