Gola Wanî ke bi qerax û girawanê xo sey wareyê turîzmî ya, nê serranê peyênan de bîya hedefê AKP û yê terefgiranê aye.

Gola Wanî ke gola tewr xişne ya dinya ya bi awa sodayin a, bi weşikîya xo ya xozayî her kesî kena heyranê xo. Hewzaya Gola Wanî de ke hewzayêka padaye ya, nêzdîya 2 mîlyon însanî est ê. Cêko ke şaredarîyê Erdîş, Mûradîye, Tûşba û Artemêtanî destê HDPyî ra bi raya qeyûman ameyê girewtene, qeraxê nê qezayan şarî rê ame qedexekerdene. Seba AKPyijan û sazîyanê dewlete kerdî wareyê rantî.

Qeraxî ameyî pêşkeşkerdene

Qeyûmê Erdîşî qeraxê bajarî ra 10 kmyî de xeylê kargehî viraştî û dayî AKPyîjan. Qeyûmî sewbîna xeylê cayê qeraxê bajarî serdest kerdî. Nê cayanê serdestkerdîyan de xeylê kargehî sey cafe û restorantan viraştî û dayî terefgiranê xo. Qeyûmê Artemêtanî zî  destpêkî ra bi desan kargehê şarî yê qeraxî rijnayî. Awayîyê neweyî viraştî û dayî terefgiranê xo.

Asîmîlasyonê kulturî

Cayêko bîn ê hetê qeyûmî ra ameyo serdestkerdene qezaya Mûradîye ya. Weşikîya xozayî ya na qeza û sewbîna girikê ke 10 hezar serre yî û dewa Ernîsî ke wareyê nuştox Yaşar Kemalî yo, hedefê AKP de yê. Qeraxê Ernîsî û derûdorê ci seba ke kultur û tarîxê kurdan tede vindî bibo, qeyûm û qeymeqam bi îdîya ‘‘yê tirkan o’’ nameyê ‘‘Atayûrt’’ konê tirkan viraştî.

Înan qerar kerd vîyartbarî

AKP û terefgiranê aye ke bajarê Wanî û qeraxê ey xo rê kerdî merkezê rantî, seba ke nê wareyanê rantî hîna gird bikerê, Gola Wanî rê qerarê ‘‘Wareyê Pawitişî û Xebitnayîşo Bikontrol ê Wareyê Sîtî yê Xozayî’’ hazir kerdo. Nê qerarî reyde derûdorê Gola Wanî de awayîyî bêrê viraştene. Nê qerarî reyde derûdorê Gola Wanî şarî rê ame qedexekerdene, la AKP û terefgiranê aye rê serbest o. Nê rojanê peyênan de Şaredarîya Bajarê Gird aya ke hetê qeyûmî ra ameya serdestkerdene, mabênê Kela Wanî û Lîmanê Wanî pak kena. Na pakîya herre ya 14 km, wareyê cuye yê bi hezaran gandaran talan kena. Yeno vatene ke nê karî ra dima qeraxê Gola Wanî do AKP û û terefgiranê aye rê seba rantî bêrê pêşkêşkerdene

Cugehpawitoxan dîyar kerd ke karê qeyûm ê pakkerdişê qeraxan karê xapênayîşî yo û vanê, ‘‘Demêkê zaf nêzdî de do qeraxê Gola Wanî bi temamî serdest bikerê û xo rê bikerê wareyê rantî’’