Qezaya Îlîçî ya Erzînganî û qezaya Gîyadînî ya Agirî de bi sîyanurî cigêrayîşê madenkarîye yeno kerdene. Wekîla DEM Partî ya Dêrsimî Aytene Kordu derheqê babete de ANFyî rê qisey kerd.

Wekîlanê DEM Partî Aytene Kordu, Sumeyye Boz, Nejla Demîr, Heval Bozdag û Sezaî Temellî derheqê babete de 5ê kanûne de vernîyazo hempar dabi.

Aytene Kordu pare kerd ke înan derheqê cigêrayîşê madenkarîye yê bi sîyanurî de Wezîrîya Vurîyayîşê Awhewayî, Şaristanîye û Xoza rê vernîyazêk dayo û vat: ''Wezîrî persanê ma ser o vat 'Zerarê nê cigêrayîşî weşîya merdiman rê çin o. Kontrolî ameyî kerdene û asta tewr berze de cezaya pereyî dîyaye.' La ma zanenê ke şîrketa madenî newe ra dest pê karî karo. No jehrê madenan herême ra derbazê çimeyanê awe beno û Çemê Firatî ra xo resneno heta Bafra. Nê kîmyewîyî benê sebebê zeraranê cidîyan.''

Aytene Kordu projeyê madenkarîye sey kolonyalîzmî pênase kerdî û vat: ''Madenî û HESî şarê herême rê nêpersîyenê û wina yenê awankerdene. No Kurdîstan de sey polîtîkaya şerê taybetî yena caardene. Nê awbendî û madenî karê kolonyalîzmî yê. Wexto ke cayêk de kultur, iwan û bawerîya şarê ucayî çin bihesibîyê û çîyo ke şarê herême rê fayde nêkero bi sîyanurî bêro vetene hem merdimî bêrê asîmîlekerdene hem zî çimeyê ci bêrê talankerdene hînî nameyê nînan kolonyalîzm o. Nê karê madenan ganî hêverî şarê herême, rêxistin û dezgehanê herême rê bêrê persayene û rizaya nînan bêra girewtene. Derdê AKP-MHPyî reynna zêdînayîşê qezencê xo yo. Coka erdê ma pêşkêşê sermaye keno.''

Aytene Kordu da zanayene ke karê madenan zeraranê pîlan danê herême ke nê zeraran ra agêrayîş nêbeno. Aytene vat: ''Sîyanur madeya kîmyewî ya jehrîn a. Nê madenî heywanan, daran, merdiman û pêro gandaran tehdît kenê. Herêma Îlîçî herêmêka pîl a ke kişta ci de Dêrsim est o. Wazenê bi nê karan herême 'rehabîlîte' bikerê. Nê karî û madeyê sey sîyanurî do bibê sebeb ke pitî bi hawayêkê astengdarî dadîya xo ra bibê, waqayê kanserî bizêdîyê.''