Dêrsim de cayo ke Çemê Munzurî û Çemê Pilemurîye resenê pê sey cayêkê fîrazî qebul beno. Dêrsimijî nê cayî rê vanê 'Gola Çetu.' Goreyê bawerîyan Xizir tîya de musahîbîye daye Munzur. Pêresayîşê nê wird çeman îsbatê îqrarê Rêya Heqî yo û fîraz o. Wexto ke heredîyayeyî haştîye kenê yenê Gola Çetu îqrar danê û gênê.

Serra 2009î de seba viraştişê Awbendê Uzunçayirî amebi waştene ke Jîyargeyê Gola Çetu binê awe de bimano. Nêrazîbîyayîşan ra dima qismêkê Gola Çetu ame xelisnayene.

Dayîke Besere û dayîke Fatma rîyê xo sawenê nê cayê fîrazî yê Duzgin Babayî.

Dayîke Besere Yoltay vana: ''Na bawerîya ma ya verên a. Ma verî zî loqmayê xo pewtêne ardêne tîya. Ma tîya de şîva vînenê. Verî ma feqîrîye, tengîye dîye. La ma her roje nêweş nêbîyêne. Nika her çi esto la ma nêweşxaneyan ra nêvejîyenê. A roje didanê mi dejayêne. Domananê mi waşt mi berê nêweşxane la mi qebul nêkerd. Mi keye ra teberik girewt û eşt Uşêne Ana. Dejê mi cade vindert. Na zî bawerîya min a.''

Dayîke Fatma Gulmez zî wina vana: ''Jîyargeyê ma, cayê ma yê fîrazî binê awe de mendî. La ma qet înan xo vîrî ra nêkenê. Ma tîya de qurbananê xo sere birnenê, çilayanê xo tafînenê.  Eke cayêkê ma bidejo ma yenê rîyê xo sawenê tîya. Verî her kes ameyêne Gola Çetu.  Nika çew nêno. Rîyê vîrusî ra ma nêeşkenê wina rehet bigêrê.  65 serreyan rê astengîye esta. Ez serê sibayî 10 de yena tîya şan 20 de şina keye. Wexto ke ez yena tîya derdê dinya xo vîrî ra kena.''