Colemêrg de bazirganîya serê sînorî qedexe ya coka xizanîye û bêkarîye zî zêdîyena. Şaristan de berardiş kêm o û berhemî bi giranî teberê şaristanî ra yenê peydakerdene.

Rabîa û Resul Îhtîyatlioglu  Colemêrg de rixmê krîzê ekonomîkî çewlîgêkê kergan bi îmkananê xo awan kerdo û bi nê hawayî hem debara keyeyê xo kenê hem zî tewrê berardişî benê.

Resûl Îhtiyatogluyo ke verî teknîsyenê ceyranî bi, sebebanê sîyasîyan ra 5 serran zîndan de mend û dima ke zîndanî ra vejîya zî nêeşka karêk bivîno. Resul Îhtîyatliogluyî naye ser o bire daye ke karê xo awan bikero. Resulî dest pê karê weyekerdişê kergan û hakan kerd.

Resul Îhtîyatliogluyî pare kerd ke 2 serrî yo ê nê karî kenê û vat: ''Par rewşa ma hol bi la emser krîzî ra rewşa ma hol nîya. Par ma kolîyêkê hakan 20 lîra ra rotêne emser 70 lî ra la reyna zî ma çîyêk qezenç nêkenê. Krîzê ekonomîkî ra her çi vay bîyo. Mi 400 heywanê xo neçarîye ra rotî. Colemêrg de potansîyelê muşterîyan û bazarî est o la seba ke genim beno vay ma nêeşkenê qezenç bikerê. Eke wina dewam bikero ez do çewlîgê xo biqefilna.''

Rabîa zî qala zor û zehmetîyan kerde û dîyar kerd ke înan muracatê xeylêk cayan kerd ka çîyêk nêkewto destê înan. Rabîa vat: ''Ma nêeşkenê kergan weye bikerê. Vateyê 'berardoxan rê paştî dîyena' raşt nîyo. Heta nika ma nêeşka paştdayîş bigêrê. Nika 500 kergê ma est ê. Ma serê sibayî rew wurzenê, kerganê xo vejenê teber. Colemêrg de zafêr berhemê werdî teberî ra yenê. Yanî tîya de berardiş çin o. Coka ma wazenê ber bîyarê.''