2019 ra nata bi bahaneya 'asayîşî' Şirnex de seba viraştişê qereqol û kalekolan qirkerdişê xoza dewam keno.

Goreyê xebera Ajansê Mezopotamya qoricîyî binê çimdarîya dewleta tirke ya îşxalkere de herêmanê Cinîwer, Xerbigê, Bestin, Navyan, Bêlûzer, Şerevan û Rîsorî de û waranê daristanan Kaniyamîr, Birateto, Birapeşo, Deyndarok, Serêrû, Tîkera, Qûrteka Pêşya û Girê Derîncê de darî birnenê. Hetê bînî ra herêma Cûdî de waranê Ax Reşka, Çala Nêriya, Çala Guza û Deriyê Çirçira de zî darî birîyenê.

Darê ke birîyenê seba ke bêrê rotene pê TIR û kamyonan kirişîyenê baregehanê leşkeran û kalekolan û şaristananê bînan. Seba ke zimistanan bêrê vêşnayene darî yenê berdene bi qereqolan.

Tay darî zî noqtayanê kontrolî de yenê pêserkerdene.