Dewa Kedekî ya qezaya Pulurî ya Dêrsimî de erazîyê 80 doniman de hetê 10 cinîyan ra hesadê fasulyayan yeno kerdene. Cinîyî serê sibayî şinê hêgayan şan erey agêrenê keyeyanê xo. Cinîyan qala zehmetîya xebata xo kerde.

Dadîya 3 domanan Makbule Yilmaza 48 serre da zanayene ke mêrdeyê aye  rîyê Korona ra nêeşkeno kar bivîno coka a ge şina keyeyan pakî kena ge zî hêgayan de xebitîyena. Makbule vat: ''Domanê mi pîl ê la nêeşkenê karêk bivînê. Ma nêeşkenê nan berê keyeyê xo. Her çi zaf vay o, merdimî gês verî ra mirenê. Hînî ganî çareserîya nê krîzê ekonomîkî bêra dîyene. Nêbo merdimî do bikewê yewbînan.''

Aysele Erena 45 serre zî wayîrê 3 domanan a. Aysele pare kerd ke ê hamnanan xebitîyenê la zimistanan tim keye de yê. Aysele vat: ''Ma zimistanan bi nê pereyî îdare kenê. Heta ke destê ma ra bêro ma xîret kenê ke pê xo bidevirnê. Nika rîyê janî ra cuye hîna bîye zehmetin. Çew qîmet nêdano ma. Kar de yew asayîşê ma zî çin o.''

Dilize Surguna 54 serre ard ziwan ke ê heqê keda xo nêgênê û vat: ''Ê paştîya ma ra pereyan visnenê destî. Yew qîmetê karkeran çin o. Na ra pey hukmat zî seba karkeran çîyêk nêkeno. Ma qerqilîyenê.''