Dewa Otlubahçe ya qezaya Pulurî ya Dêrsimî ke Parka Mîllî ya Munzurî de ca gena de şîrketêka madenî ya Savaş Sertkayayî nêzdîya ci de ocax akerd. Îdarekarê partîyanê sîyasîyan û rêxistinanê komelê sîvîlî zî tede dersîmîjan vera naye nêrazîbîyayîş mojna.

Dêrsimîjê ke meydanê Pulurî de ameyî têhet pê wesayîtan verê xo da dewa Otlubahçe. Vejîyayîşê qeza de şar hetê leşkeranê tirkî ra ame vindarnayene. Têna çend kesî eşkayî semedê tespîtkerdişê rewşe astengî ra ravêrê. Hemserekê HDPyî yê Dêrsimî Îbrahîm Kasun û avûkat Bariş Yildirim zî tede hewt kesan ra grûbêke şîye warê madenî. Heyetê ke herême de cigêrayîş kerd badê agêrayîşî eşkerayîye daye.

Îbrahîm Kasunî vat: ''Cayê ke xoza rê mudaxale yeno kerdene ekosîstem xeripîyeno. Cografyaya Dêrsimî de heta nika ekosîstem zaf hole ame pawetene. La nika şîrketanê madanî çim verdayo Dêrsimî. Şîrketê madenî yenê tîya xoza û koyan qir kenê. Ma do destûrê nê qirkerdişî medê.'' Bariş Yildirimî zî ard ziwan ke seba ke no war Parka Mîlî ya Munzurî de ca geno, înan gerre kerdo û xebitnayîşê makînayan dayo vindarnayene. Yildirimî vat înan waşt ke wa nê makîneyê karî cade herême ra vejîyê û vat ê do tim mîrasê kulturkî yê Dêrsimî bipawê.