Dewa Tîlekî ya qezaya Pulirî ya Dêrsimî de bi serran o meseleya awe, ceyran û rayîran dewam kena. Roniştoxanê dewe dîyar kerd ke rixmê muracat û waştişnameyanê înan zî meseleyê înan nênê çareserkerdene.
Dewa Tîlekî ya qezaya Pulirî ya Dêrsimî serra 1994î de hetê dewleta tirke ra amebî vengkerdene. Dewijî 2010 ra nata agêrenê dewa xo la dewe de 12 serrî yo meseleya awe, ceyran û rayîran nêna çareserkerdene.
Elîfe Tuluma ke 2010 de agêraya dewe ard ziwan ke 10 serran ê dewe de têna mendê û vat: ''Ma hende waştişnameyî dayî la ceyran nêdîya dewe. Ma awe arde la ma rê nêvejîyena. Rayîrê ma xirab ê. Dewa ma rê xizmet nêno kerdene. Ma têna pê heywankarîye debara xo kenê. Sîgortaya ma çin a, ma teqawut nêbîyî. Seba ke awe û ceyran çin ê ma nêeşkenê çîyêkî zî biramê.''
Seyît Sultan Çelîkî da zanayene ke 1994 de dewe de 30 keyeyî est bîyî û vat: ''Şar wazeno abigêro dewe la rayîrê ma zaf xirab ê. Ma qaşo sebzeyî ramitî la awe çin a ke ma bida ci. Nê şertanê xiraban ra dewijî nêeşkenê abigêrê dewe. Seba ke ceyran bêro dayene ganî dewe de 10 keyeyî est bibê. Nika 3 keyeyî est ê. La nê şertan de çew nêeşkeno keye zî virazo. Wina aseno ke dewlete do ceyranî nêda ma. Ma wazenê wa meseleyê ma bêrê çareserkerdene.''
