Bi nameyê Ahmet Senurî de keso ke şerê Sûrîye de lajê xo û cinîya xo vînî kerdî, remayo Tirkîya û nika bi 5 torinî û veyveka xo Îzmîr de cuyeno. Senur tornanê xo bi arêdayîşê eşteyan dano wendiş û bi wesayîtê eşteyan înan mîyanê bajar de gêrneno.

ŞERÎ HEME ÇÎYÊ MA GIREWT

Kalikê Senur vano ‘çîyo tewr zaf mi dejneno o yo ke ma hertim mecbûr manenî şerî ra biremî û ti kes çin o ke ez domanan teslîmê înan bikera’ û wina domna: “Ez mîyanê eşteyan de gêrnayîşê tornanê xo ra zerrîweş nêbena. Ez zî wazena ke wa ameyeyêko baş yê nê domanan bibo. Labelê çi heyf ke welatê ma de şer esto û nê şerî heme çîyê ma ma ra girewtî.”

LAJ Û CINÎYA CI ŞER DE MERDÎ

Kalikê Senur wexto ke qala şerî keno, çimê ey ra hesirî war benî û vano ‘Nê şerî laj û cinîya mi mi dest ra girewtî, mi tena şêna tornanê xo bixelisna’ û wina dewam kerd: “Ma pereyo ke qezenç kenî reyde ancax pîzeyê xo mirdî kenî. Ez zaf kar gêraya, labelê mi nêdî. Her kesî mi ra va ‘ti extîyar î û ti nêşênî bixebetyî’. Mi zî qerar girewt ke ez karêko winasî bikera. Ameye de se beno qet dîyar nîyo.