Tirkîya û Kurdîstan de dramê karkeranê serrwextî dewam keno. Goreyê doneyanê fermîyan Tirkîya de tewr tay 600 hezar karkerê serrwextî est ê la goreyê doneyanê nefermîyan zî 3 mîlyon karkerê serwextî est ê. 

Se ra 95ê karkerê serrwextî zî kurd ê. Karkerê serrwextê ke bê sîgorta xebitîyenê, raştê nîjadperestîye yenê. 

Nuştox Asrin Keleşî derheqê meseleyanê karkeranê serrwextî de ANFyî rê qisey kerd.

Keleşo ke 'raporê ercnayîşê şertanê cuye yê karkeranê zîretî yê serwextî' ser o xebitîyeno ard ziwan ke meseleyê karkeranê serrwextî nênê dîyene. Keleşî vat: ''Karkerê serrwextî nîsane ra heta teşrîna verêne-teşrîna peyêne şinê axpînan de xebitîyenê, xeyman de manenê û seba asayîşê înan tedbîrî nênê girewtene. Ma nê karkeran reyde raporî amade kenê. Ê bi israr ê ke şerê înan ê cuye û heqê înan ê qanûnî wa bêrê caardene.''

Keleşî pare kerd ke karkerê serrwextî xeyman û konteyniran de yenê cakerdene û vat: ''Sendîkayî, rêxistinê komelê sivîlî û partîyê sîyasîyî bi hawayêkê qîmî bala xo nêdanê meseleyanê înan ser. Seba ke nê merdimî mîyanê şertanê holan de biciwîyê û verê karkerîya domanan bigêrê xîretê ma dewam kenê. Hema hema awa pakîye zî nêdîyena nê karkeran.

Axpînê ke ê tede xebitîyenê varanî ra gole bibê zî ê tede manenê. Tuwaletê xeyman û konteyniran goreyê şertê weşîye nîyê. Ganî îdareyê herêmîyî nê şertanê karkeran hol bikerê. Dezgehê weşîye zî nê xeyman zîyaret nêkenê û perwerdeyê domananê karkeran zî yeno peygoşkerdene.''