Qezaya Licikî ya Erzînganî de madenê zerdî de hezaz qewimîyabî. Karê cigêrayîşî yê seba 9 karkeran vindertî. Polen Ekolojî ra Tugba Kahraman derheqê babete de qisey kerd.

Tugba Kahraman îfade kerd ke zehmet o ke bîlançoya ekoqirkerdişî ya nê felaketî bêra texmînkerdene û vat: ''Sîyanur û madeyê kîmyewî yê giranî do tewrê Firatî bibê. Felaketê Licikî tewr tay do 100 serran dewam bikero. Erdo jehrîn ver bi çep û raştî vila bi. Dima ke varan vara zî derbazê binê erdî  bi. Nika herême de pêro heywan, însan û gandarî binê tehlukeyî de yê. Tesîranê vilabîyayîşê sîyanurî ra nêweşîyê sey KOAH û kanserî do neslanê neweyan de rîbidê.''

Tugba Kahraman ard ziwan ke Tirkîya vurîyaya warê çopan ê Yewîya Ewropa û vat: ''Şuxilnayîşê sîyanur û asbestî yo winayên mojneno ke sermaye seba qezençkerdişî heqê cuye yê merdiman û pêro gandaran erzena binê tehlukeyî û dewlete zî sermayedaran de têkilîya xurte mîyan de ya. Meseleya ekolojîje meseleyêk a ke rîyê kapîtalîzmî ra qewimîyena. Bi xurtkerdişê têkoşînî ma eşkenê verê qirkerdişê ekolojîkî bigêrê.''