Qezaya Pulurî ya Dêrsimî de Gelîya Munzurî tehlukeyanê pîlan reyde têrî ya. Gelîye 1971 de hetê Heyetê Wezîran ra sey 'Parka Milî' amebî îlankerdene. Gelîye 42 hezar hektar a, tede hezar û 518 tewirê nebatan estê û nînan ra 227 hebî endemîk ê. Rixmê hende zengînîye zî gelîye bêwayîr a. Dima ke hamnan dîya nufusê şaristanî zêdîya, turîstî ameyî şaristanî coka lêşinîye zî zêdîyaye. Hetê bînî ra dewleta tirke zî binê nameyê 'hîrakerdişê warî' de gelîye texrîb kena. Gelîye de gandarî mirenê, heywanê koyî bi taybetî pêzkovîyî nêeşkenê xo biresnê gelîye. 

Avûkat Bariş Yildirimî derheqê mesele de Ajansê Mezopotamya rê qisey kerd. Yildirimî da zanayene ke tedbîrê ke mewzuat de ca gênê seba Gelîya Munzurî nênê caardene. Yildirimî îfade kerd ke ganî parke hetê asayîşî ra bêra pawitene, sîrkulasyonê merdiman û zîyaretanê merdiman bêrê kontrolkerdene.

Yildirimî eşkera kerd ke gelîya ke warêko fîraz ê elewîyan o vurîyayo warê pîknîkî û gelîye pê çopan dekerde ya. 

Yildirimî bale ante xebata hîrakerdişê rayîrî û vat: ''Nê xebetan ra semed xozaya gelîye xeripîyena. Nê xebatan de Jîyargeyê Fatma Ana de tay darî birîyayî ke bawerîya Dêrsimî de dar û gandarê zîyaretgehan fîraz ê û ganî dest nêro dayene înan.  Ganî Gelîya Dêrsimî debikewa Lîsteya Kulturî ya Dinya. Ma nika seba ney xîret kenê. Nika flora, fauna û peyzajê Dêrsimî yenê texrîbkerdene. Gandarî hê mirenê. Pulurî ra heta Dêrsimî kanalîzasyon herikîyeno. Ganî tedbîrî bêrê girewtene û tesîrê kanalîzasyonî virazîyê.''

Yildirimî venga zîyaretkeranê gelîye da û vat: ''Ganî ma gelîye de adir mevisnê ta û pîknîk mekerê. Ganî selahîyetdarî nê warî de şarî hîşyar bikerê, kontrol bikerê.''