Karkerê serwextî yê qezaya Pêrî ya Dêrsimî prosesê pandemî de xeyma 20 metre de bê awe û ceyranî ciwîyenê. Karkerî roje de 12 saetan xebitîyenê. 

Hemwelatîyanê ke rihayîj ê û seba xebate ameyî Dêrsimî Jinnewsî rê qisey kerd. 

Medîne Gozeten (27) derheqê probleman de qisey kerd û vat: "Cayê ke ma werd hadre kenê, nişenê ro tena 20 metrekare yo. Wextê ke varan vareno, ma xeylêk zehmetî ancenê. Ne ceyran ne awe esta. Gelo na cuye ya? Karsazî awe bi tankêran anê. Ma bi bîdon û satilan awe benê çadiran. Tankêrê awe dûştê rayîrî yê. Rayîr cit şerîd o. Wesayîtî bi lez derbas benê. Ma tehluke danê verê çiman û awe anê. Ma werdê xo zî serê adirî de viraznenê."

Buşra Çîftçay zî pare kerd ke karkerîya serwextî semedê cinîyan xeylêk zehmet a û vat: "Cayê ke ma xebityenê heme lazimî ma bi ca anê. Ma hem serê erdî de hem zî şan de xebityenê. Werd, cilî, firaq, tûtî. Heme bare serê milê ma de ya. Dayîkî zaf zehmetîyan ancenê. Dergûşê ma serê erdan de serdî ra, tîjî ra, herre ra pê tesîr benê. Xeylê dergûşî semedê ney nêweş kewenê."

Nurcane Çîftçay (20) da zanayene ke ê her bajarêk de aşmêke manenê û vat: "Nimûne gulane de karê kolane qedîya, ma hînî şîyî arêdayîşê gilyazan, arêdayîşê mişmişan, findikan. Bi kilmî ma 7 mengan rayîran de yê û 4-5 bajaran vurnenê. Nîmeyê qezencê ma şino rayîr û lazimîye. La ma mecbûr ê şêrê."