Kobanê û Minbic de hesadê zeytunan dest pêkerd
Varanê verênî yê payîzî ra dima Kobanê û Minbic de hesadê zeytunan dest pêkerd. Emser Kobanê de zeytunî bibereket nîyê la Minbic de eqsê ci rîyê berardoxan huyenê.
Kobanê
Kobanê de şar serra 2002î ra nata verê do dano zeytûnêran. Şaristan de deweka Qerî de citkare Zeynebe Ehmed îfade kena goreyê parî hesadê zeytunan kêmîyayo.
Citkarê bînî yê bi nameyê Mihemed Dabanî zî vat: ''150 zeytunêrê mi estê. Semedê germîye ra hesadê ma parî ra tayêr o.Ma zafêr ronê zeytunanê xo seba zimistanî danê were. Çunek ronê ma zaf bikalîte yo.''
Minbic
Citkaranê Minbicî zî varanê verênî ra dima dest pê hesadê zeytunan kerd.
Citkaranê Minbicî ra Alaeddîn Salîhî pare kerd ke 12 hektarê zeytunêrê ci esto û emser zeytunî zaf bibereket ê.
Minbic de tenekeya ronê zeytunan 60 hezar lîraya Sûrîye ya, kîloyêkê zeytûnan zî heman o. Goreyê Komîteya Zîretî ya Minbicî şaristan de hesad se ra 35 ame kerdene.
